Live Updates

بارشوں کے 3 سلسلے پاکستان کیجانب بڑھ رہے ہیں، پانی کے ذخائر میں خطرناک حد تک اضافہ متوقع

اتوار 17 اگست 2025 19:55

اسلام آباد (اُردو پوائنٹ اخبارتازہ ترین - این این آئی۔ 17 اگست2025ء)نیشنل ڈیزاسٹر مینجمنٹ اتھارٹی (این ڈی ایم ای) نے اگلی24 سے 48 گھنٹوں کے دوران پانی کے ذخائر میں خطرناک حد تک اضافہ ہو نے کا امکان ظاہر کیا ہے۔جنرل منیجر این ڈی ایم اے زہرا حسن نے میڈیا بریفنگ میں بتایا کہ اگلے 24 سے 48 گھنٹوں میں شدید بارشیں متوقع ہیں، تربیلا ڈیم میں اس وقت 98 فیصد پانی بھر چکا ہے، اگلی24سے 48 گھنٹوں کیدوران پانی کے ذخائر میں خطرناک حد تک اضافہ ہو سکتا ہے۔

جنرل منیجر این ڈی ایم اے زہرا حسن کے مطابق کٹاریاں اور گوالمنڈی میں 15 فٹ تک پانی کی سطح بلند ہو چکی ہے، کوہ سلیمان کے ساتھ علاقہ جات میں آج سیبارش کا نیا سلسلہ شروع ہو چکا ہے، آزاد جموں و کشمیر کے نیلم، پونچھ اور باغ میں سیلاب کے خطرات بڑھ گئے ہیں، خیبرپختونخوا میں پشاور،چترال،دیر،چارسدہ میں سیلاب کے خطرات زیادہ ہیں۔

(جاری ہے)

دوسری جانب ٹیکنیکل ایکسپرٹ این ڈی ایم اے ڈاکٹر طیب شاہ نے میڈیا بریفنگ میں بتایا کہ بارشوں کا موجودہ سلسلہ 22 اگست تک جاری رہے گا جن میں مزید شدت متوقع ہے،افغانستان کے ننگرہار اور قندھارریجن سے ایک سلسلہ پاکستان کی جانب بڑھ رہا ہے، اس کے علاوہ خلیج بنگال کی جانب سے بھی ایک نیا بارشوں کا سلسلہ پاکستان کی جانب بڑھ رہا ہے۔

ڈاکٹر طیب شاہ کے مطابق 22 اگست کے بعد مون سون کا ایک اور سلسلہ شروع ہو گا، بارشوں کے 3 مزید سلسلے پاکستان کی جانب بڑھ رہے ہیں، شمالی علاقہ جات اور پنجاب کے علاقے شدید خطرات کا شکار ہیں۔ ممبر آپریشنز این ڈی ایم اے بریگیڈیئر کامران نے میڈیا کو بریفنگ دیتے ہوئے کہا کہ فروری 2025 سے موجودہ مون سون کیلیے تیاری شروع کردی گئی تھی، صوبائی حکومتوں کے ساتھ موجودہ مون سون کیلیے نقصانات سے بچاؤ کے اقدامات کیے گئے،بونیر اور باجوڑ میں تباہی کلاؤڈ برسٹ کی وجہ سے ہوئی،دو روز میں 337 لوگ اب تک جاں بحق اور 178 لوگ اب تک زخمی ہیں۔

بریگیڈیئر کامران نے کہا کہ آرمی اور ایف سی کے ذریعے صوبائی حکومت کو ریسکیو کے لیے وسائل مہیا کیے،کل بونیر میں وفاق کی طرف سے امدادی سامان کی دوسری کھیپ روانہ کی جائے گی۔