بھارت کو عسکری ٹیکنالوجی کی منتقلی امریکی کمپنیوں کیلئے خطرناک ہو سکتی ہے ، امریکی عہدیدار

پیر 18 اگست 2025 17:03

واشنگٹن (اُردو پوائنٹ اخبارتازہ ترین - اے پی پی۔ 18 اگست2025ء) امریکا نے کہاہے کہ بھارت کو جدید عسکری ٹیکنالوجی منتقل کرنا امریکی کمپنیوں کے لیے ایک خطرناک قدم ہو سکتا ہے۔ کشمیرمیڈیاسروس کے مطابق وائٹ ہائوس کے تجارتی مشیر پیٹر نیوارو نے فناشل ٹائمز میں شائع ہونےو الے مضمون میں کہاہے کہ بھارت کی روسی خام تیل کی خریداری روس کو یوکرین جنگ میں مالی مدد فراہم کر رہی ہے۔

انہوں نے کہاکہ بھارت کو روس سے خام تیل خریدنا بند کرنا ہوگا۔

(جاری ہے)

پیٹر نیوارو نے کہاکہ بھارت اب روس اور چین دونوں کے قریب ہو رہا ہے، اگر بھارت چاہتا ہے کہ اسے امریکا کا اسٹریٹجک پارٹنر سمجھا جائے تو اسے اس کے مطابق برتائو کرنا ہوگا۔انہوں نے کہا کہ امریکی کمپنیوں کے لیے بھارت کو جدید عسکری ٹیکنالوجی منتقل کرنا ایک خطرناک قدم ہو سکتا ہے۔ گزشتہ ہفتے امریکہ نے بھارت کو خبردار کیا تھا کہ اگر صدر ٹرمپ اور ولادیمیر پیوٹن کے درمیان مذاکرات ناکام ہوئے تو وہ بھارت پر مزید ٹیرف لگائے گا۔امریکی وزیرِ خزانہ اسکاٹ بیسنٹ نے کہا تھا کہ امریکہ نے جو اضافی 25 فیصد ٹیرف بھارت پر لگایا ہے وہ مزید بڑھایا جا سکتا ہے۔