امریکا کا پاکستان میں تیل و گیس کیلئے 7 ارب 50 کروڑ ڈالرز کی سرمایہ کاری کا امکان

پاکستان نے سرمایہ کاری کیلئے 40 آف شور بلاکس کی بولی کی پیشکش کر دی،حکومتی ذرائع

منگل 19 اگست 2025 20:26

امریکا کا پاکستان میں تیل و گیس کیلئے 7 ارب 50 کروڑ ڈالرز کی سرمایہ کاری ..

اسلام آباد(اُردو پوائنٹ اخبارتازہ ترین - این این آئی۔ 19 اگست2025ء)تیل و گیس سیکٹر میں امریکی سرمایہ کاری لانے کیلئے پاک امریکا مذاکرات ہوئے ہیں۔حکومتی ذرائع کے مطابق امریکی سرمایہ کاری تیل کے خشکی اور سمندری ذخائر میں لائی جائے گی، امریکا تیل و گیس کی تلاش کیلئے 7 ارب 50 کروڑ ڈالرز سرمایہ کاری کر سکتا ہے۔

(جاری ہے)

حکومتی ذرائع کے مطابق پاکستان نے سرمایہ کاری کیلئے 40 آف شور بلاکس کی بولی کی پیشکش کر دی، ایک آف شور بلاک کیلئے تقریباً 15 کروڑ ڈالرز کی سرمایہ کاری درکار ہے، مجموعی طور پر 40 آف شور بلاکس کی کامیاب بولی پر 6 ارب ڈالرز کی سرمایہ کاری متوقع ہے۔

حکومتی ذرائع نے بتایاکہ پاکستان نے خشکی پر تیل کے ذخائر کی تلاش کیلئے 23 بلاکس بولی کیلئے آفر کیے، خشکی پر تیل کے ذخائر کی تلاش کے ایک بلاک کیلئے 6 کروڑ 50 لاکھ ڈالرز درکار ہیں، 23 آن شور بلاکس کی کامیاب بولی پر تقریباً ڈیڑھ ارب ڈالرز کی سرمایہ کاری آئے گی۔حکومتی ذرائع نے بتایا کہ سمندر میں تیل کے ذخائر کی تلاش کیلئے آف شور بلاکس کی بولی 31 اکتوبر کو کھولی جائے گی، خشکی پر تیل کے ذخائر کی تلاش کے بلاکس کی بولی 10 اکتوبر کو اوپن کی جائے گی، بولی میں ترکش پیٹرولیم کمپنی بھی سرمایہ کاری میں دلچسپی کا اظہار کر چکی ہے۔