غیر ملکی مہمان کی آمد و رفت کے باعث ایکسپریس ہائی وے اور سرینگر ہائی وے پر ٹریفک کی روانی میں مختلف اوقات میں کچھ دیر کے لئے تعطل آئے گا، ترجمان ٹریفک پولیس

بدھ 20 اگست 2025 17:33

اسلام آباد (اُردو پوائنٹ اخبارتازہ ترین - اے پی پی۔ 20 اگست2025ء) غیر ملکی مہمان کی آمد و رفت کے باعث مختلف اوقات میں کورال، فیض آباد ایکسپریس ہائی وے، مری روڈ کلب روڈ ، سرینہ، ریڈیو پاکستان اور زیرو پوائنٹ، سرینگر ہائی وے سرینہ ہوٹل پر آج (بدھ کو) غیر معمولی سکیورٹی انتظامات کیے گئے ہیں۔شام 06:00 بجے سے 08:00 بجے رات روٹ کے باعث ایکسپریس ہائی وے اور سرینگر ہائی وے پر ٹریفک کی روانی میں کچھ دیر کے لئے تعطل آئے گا۔

ٹریفک پولیس کے ترجمان کے مطابق ٹریفک سست روی کا شکار ہو گی،شہری ایکسپریس ہائی وے اور سرینگر ہائی وے سے منسلک سروس روڈ کا استعمال کریں۔بلیو ایریا، سیکٹر F-6 اور F-7 کی جانب سفر کے لئے ایچ ایٹ انڈر پاس کا استعمال کیا جائے۔ اسلام آباد ٹریفک پولیس کے مطابق ریڈ زون اور سرینہ ہوٹل آنے جانے والی ٹریفک مارگلہ روڈ، جناح ایونیو، ایوب چوک اور نادرا چوک کا استعمال کرے۔

(جاری ہے)

بری امام جانے والے شہری نادرا چوک کا استعمال کریں، سیکٹر آئی اور ایچ کے لئے راولپنڈی پشاور روڈ، آئی جے پی روڈ سے سروس روڈ کا استعمال کریں۔ مری روڈ سے سرینہ اور فیض آباد براستہ راول ڈیم دوران آمد و رفت بند رہے گی۔ چیف ٹریفک پولیس نے کہا کہ شہریوں کی رہنمائی کے لئے اسلام آباد ٹریفک پولیس مختلف مقامات پر موجود رہے گی۔ کسی بھی سفری دشواری سے بچنے کےلئے شہری 20 منٹ کا دورانیہ رکھ کر گھر سے نکلیں۔سفر کے دوران کسی بھی پریشانی اور رہنمائی کے لئے ہیلپ لائن 1915 پر رابطہ کریں۔سی ٹی او کیپٹن (ر)سید ذیشان حیدر نے کہا کہ ٹریفک پولیس کا سوشل میڈیا پلیٹ فارم شہریوں کو بروقت ٹریفک روٹس سے متعلق آگاہی کے لئے موجود ہے۔\932