Live Updates

عمران خان کا ذکر ہوا نہ معافی کی بات ہوئی‘ سہیل وڑائچ نے ذاتی مفاد کیلئے کہانی گھڑی، ڈی جی آئی ایس پی آر

فیلڈ مارشل نے کوئی انٹرویو نہیں دیا، جس آرٹیکل کی بات ہو رہی ہے وہ برسلز کا ایونٹ تھا اور وہاں سینکڑوں لوگوں نے تصویر بنوائی؛ لیفٹیننٹ جنرل احمد شریف چوہدری کی وضاحت

ساجد علی جمعرات 21 اگست 2025 12:41

عمران خان کا ذکر ہوا نہ معافی کی بات ہوئی‘ سہیل وڑائچ نے ذاتی مفاد کیلئے ..

اسلام آباد ( اُردو پوائنٹ اخبارتازہ ترین۔ 21 اگست 2025ء ) ڈی جی آئی ایس پی آر لیفٹیننٹ جنرل احمد شریف چوہدری کی طرف سے صحافی سہیل وڑائچ کے آرمی چیف فیلڈ مارشل عاصم منیر کے انٹرویو سے متعلق کالم پر ردعمل سامنے آگیا۔ تفصیلات کے مطابق ڈی جی آئی ایس پی آر نے سہیل وڑائچ کا فیلڈ مارشل عاصم منیر اور عمران خان سے متعلق کالم من گھڑت قرار دیدیا، اس حوالے سے میڈیا سے گفتگو کرتے ہوئے انہوں نے کہا کہ سہیل وڑائچ کے جس آرٹیکل کی بات ہو رہی ہے وہ برسلز کا ایونٹ تھا اور وہاں سینکڑوں لوگوں نے تصویر بنوائی، آرمی چیف کی طرف سے کوئی انٹرویو نہیں دیا گیا، سہیل وڑائچ نے بھی دیگر لوگوں کی طرح فیلڈ مارشل کے ساتھ ملاقات کی۔

لیفٹیننٹ جنرل احمد شریف چوہدری کا کہنا ہے کہ فوج ایک ذمہ دار ادارہ ہے، سید عاصم مُنیر نے برسلز میں کسی صحافی کو انٹرویو نہیں دیا، برسلز میں آرمی چیف نے نہ پی ٹی آئی اور نہ ہی عمران خان کا کوئی ذکر کیا، سہیل وڑائچ نے ذاتی مفاد کیلئے اپنی طرف سے کہانی گھڑی، یہ ایک صحافی کی ذاتی مفاد اور تشہیر حاصل کرنے کی کوشش ہے، سہیل وڑائچ نے نامناسب حرکت کی، سہیل وڑائچ کی خبر چھاپنے سے پہلے ادارے کو بھی ذمہ داری کا ثبوت دینا چاہیئے تھا، یا جیو اور جنگ کے خلاف قانونی کاروائی ہوگی؟۔

(جاری ہے)

ڈی جی آئی ایس پی آر نے مزید کہا کہ فوج کا 9 مئی کے حوالہ سے مؤقف واضح ہے کہ ہر کردار کو قانونی طور پر جواب دینا ہوگا کیوں کہ جو غلط حرکت کرتا ہے اس کو قانون کے کٹہرے میں آنا ہوگا، ہم واضح ہیں کہ 9 مئی کرنے والوں، اس کے سہولت کاروں اور منصوبہ سازوں کو قانون کے مطابق جواب دہ ہونا چاہیئے کیوں کہ 9 مئی صرف فوج کا نہیں قوم کا مقدمہ ہے، اس لیے ہم نے بہت واضح الفاظ میں کہا کہ اداروں کو سمجھداری کا مظاہرہ کرنا چاہیئے، میڈیا کو بھی سمجھنا چاہیئے کہ یہ مناسب نہیں، افسوس کی بات ہے کہ سینئر صحافی نے غیرذمہ داری کا مظاہرہ کیا۔