کراچی،کرنٹ لگنے سے 2بھائیوں کی موت کا مقدمہ سی ای او کے الیکٹرک کیخلاف درج

کراچی (اردوپوائنٹ اخبارتازہ ترین-انٹرنیشنل پریس ایجنسی۔21 اگست ۔2025 ) کراچی کے علاقے ناتھا خان گوٹھ میں بارش کے دوران کرنٹ لگنے سے 2 بھائیوں کی موت کا مقدمہ سی ای او کے الیکٹرک اور دیگر حکام کے خلاف درج کرلیا گیا، گلستان جوہر میں 2 روز قبل کرنٹ لگنے سے موٹرسائیکل سوار کے جاں بحق ہونے کا بھی انکشاف ہوا ہے، واقعے کی سی سی ٹی وی فوٹیج سامنے آگئی، شفیق موڑ پر بھی بچے کو کھمبے سے کرنٹ لگ گیا.

(جاری ہے)

رپورٹ کے مطابق شاہ فیصل کالونی تھانے کی پولیس نے ناتھا خان گوٹھ میں کرنٹ لگنے سے 2 بھائیوں کی موت پر ان کے والد کی مدعیت میں مقدمہ درج کرلیا مقدمے میں سی ای او کے الیکٹرک مونس علوی سمیت اعلی افسران کو نامزد کیا گیاہے، مقدمے میں غفلت و لاپروائی کی دفعات شامل کی گئی ہیں. یاد رہے کہ پیر کو ناتھا خان گوٹھ میں کرنٹ لگنے سے 10 سالہ سلطان اور 20 سالہ سراج جاں بحق ہوگئے تھے، دونوں بھائیوں کی نماز جنازہ گزشتہ روز ادا کی گئی تھی دوسری جانب لاہور الیکٹرک سپلائی کمپنی کے اہلکاروں نے بھی خفاظتی آلات اور سازوسامان کی عدم دستیابی سے برسات کے سیزن میں5اہلکاروں کی کرنٹ لگ ہلاکتوں پر چیف ایگزیکٹیو لیسکو اور متعلقہ حکام کے خلاف کاروائی کا مطالبہ کیا ہے.

لیسکو ملازمین کی تنظیم کے ذرائع نے کہاکہ لائن مین اور دیگر عملہ ربرکے جوتے‘حفاظتی بیلٹ سمیت سارا سامان خود مارکیٹ سے خریدتے ہیں کیونکہ کمپنی کی جانب سے کئی کئی سال بعد جو چند چیزیں مہیا کی جاتی ہیں وہ انتہائی ناقص کوالٹی کی ہوتی ہیں. انہوں نے بتایا کہ افسوسناک امر ہے کہ مرنے والے اہلکاروں کے خلاف شوکاز اور محکمانہ کاروائی کے نوٹس جاری کیئے جاتے ہیں جس کی وجہ سے لواحقین کو امدادی رقوم کے اجراءمیں تاخیرہوتی ہے ‘انہوں نے کہا کہ انگریزوں کے دور کے قوانین کی وجہ سے کسی علاقے کا ٹرانسفارمرخراب ہونے کی صورت میں ملازمین کو موردالزام ٹہرایا جاتا ہے اور ملازمین ٹرانسفارمر کی مرمت کے لیے صارفین سے چندہ جمع کرنے کی درخواست کرتے ہیں.

انہوں نے کہا کہ کمپنی کی جانب سے سامان مہیا نہ کیئے جانے کی وجہ سے معمولی آندھی‘بارش یا طوفان سے فیڈرٹرپ کرجاتے ہیں کیونکہ سپلائی لائنوں کی مروجہ طریقہ کار کے مطابق مرمت ممکن نہیں ہے ‘ملازمین کا کہنا ہے کہ لاہور جیسے بڑے شہر میں زیادہ ترسب ڈویژنوں میں ایک شفٹ میں صرف ایک لائن مین دستیاب ہوتا ہے جبکہ سیڑھی کے ساتھ موجود گاڑی فیلڈسٹاف کی بجائے افسران کے ذاتی استعمال میں رہتی ہے ‘انہوں نے بتایا کہ لیسکو نے2015سے نئی بھرتیوں پر پابندی عائدکررکھی ہے لہذا دس سالوں سے لیسکو کے فیلڈ سٹاف کی تعداد مسلسل کم ہورہی ہے کیونکہ شیڈول کے مطابق ہر سال اہلکار مدت ملازم پوری کرکے ریٹائرڈہورہے ہیں مگران کی جگہ نیا سٹاف بھرتی نہ کیئے جانے کی وجہ سے لیسکو میں افرادی قوت کی کمی کا بحران شدید ہوگیا ہے.