وفاقی وزیر آبی وسائل میاں معین وٹو کا وادی نیلم میں بارشوں سےمتاثرہ علاقوں کا دورہ

جمعرات 21 اگست 2025 20:40

مظفر آباد (اُردو پوائنٹ اخبارتازہ ترین - اے پی پی۔ 21 اگست2025ء) وفاقی وزیر آبی وسائل میاں معین وٹو نے سینئر وزیر کرنل(ر) وقار احمد نور، میاں عبدالوحید ایڈووکیٹ، چوہدری اظہر صادق کے ہمراہ بارشوں سے متاثرہ علاقوں جاگراں اور دواریاں کا دورہ کیا ۔متاثرہ رابطہ سڑکوں، پلوں اور گیسٹ ہاوسز سمیت دیگر انفراسٹرکچر کا جائزہ لیا۔ اس موقع پروزیر قانون میاں عبدالوحید ایڈووکیٹ نے کلاوڈ برسٹ کے نتیجے میں نالہ جاگراں اور رتی گلی نالہ کے متاثرہ علاقوں میں ہونے والے نقصانات بارے تفصیلی بریفنگ دی۔

اس موقع پر وفاقی وزیر آبی وسائل میاں معین وٹو نے میڈیا سے گفتگو کرتے ہوئے کہا کہ وادی نیلم کے متاثرہ علاقوں میں ہونے والی تباہی پرگہرا دکھ ہوا،وزیر اعظم میاں شہباز شریف کی طرف سے متاثرین سے اظہار ہمدردی کرنےآیا ہوں،سڑکوں پلوں کی تعمیر نو کے ساتھ متاثرین کے ہونے والے نقصانات کا ازالہ کریں گے، متاثرین کی بحالی کے لئے تمام وسائل کوبروئے کار لا رہے ہیں، متاثرہ انفراسٹرکچر کی بحالی کے لئے حکومت آزاد کشمیر نے آپریشن شروع کر دیا ہے، نقصانات کی رپورٹ وزیراعظم پاکستان محمد شہباز شریف کو پیش کی جائے گی،متاثرین کی بحالی کیلئے حکومت آزاد کشمیر کے ساتھ ہر ممکن تعاون کریں گے۔

(جاری ہے)

وزیر قانون میاں عبدالوحید ایڈووکیٹ نے تباہ شدہ رابطہ سڑکوں، پلوں اور گیسٹ ہاوسز کی بحالی سمیت نالوں کے ارد گرد عوام کی نقل مکانی کیلئے سفید رقبہ جات کی الاٹمنٹ کی تجویز دی۔ اس موقع پر ڈپٹی کمشنر ،ایس پی،مہتمم شاہرات بھی موجود تھے ۔