پاکستان سیاحت کے میدان میں دنیا بھرمیں نمایاں مقام رکھتا ہے‘ سردار سلیم حیدر خان

،پاکستان میں ہوٹل، ریسٹورینٹ کا شعبہ تیزی سے ترقی کررہا ہے،بزنس کمیونٹی کا ملکی تعمیر و ترقی میں کردار اہم ہے بھارت کو معرکہ حق میں ہم سب نے مل کر شکست دی،پاکستان امن پسند ملک ہے مگر اس کو کمزوری نہ سمجھا جائے‘گورنر پنجاب

جمعرات 21 اگست 2025 19:30

لاہور (اُردو پوائنٹ اخبارتازہ ترین - این این آئی۔ 21 اگست2025ء) گورنر پنجاب سردار سلیم حیدر خان نے کہا ہے کہ پاکستان سیاحت کے میدان میں دنیا بھرمیں نمایاں مقام رکھتا ہے ،پاکستان میں ہوٹل، ریسٹورینٹ کا شعبہ تیزی سے ترقی کررہا ہے،بزنس کمیونٹی کا ملکی تعمیر و ترقی میں کردار اہم ہے،بھارت کو معرکہ حق میں ہم سب نے مل کر شکست دی،پاکستان امن پسند ملک ہے مگر اس کو کمزوری نہ سمجھا جائے۔

ان خیالات کا اظہار اُنہوں نے مقامی ہوٹل اسلام آباد میں برین ڈیزائنر پاکستان کے زیر اہتمام انٹرنیشنل فوڈ اینڈ ریسٹورانٹ ایوارڈ کی تقریب سے خطاب کرتے ہوئے کیا۔ گورنر پنجاب سردار سلیم حیدر خان نے کہا کہ پاکستان میں ہوٹل، ریسٹورینٹ کا شعبہ بہت تیزی سے ترقی کررہا ہے، حکومت کی تھوڑی سے توجہ سے اس میں مزید بہتری لائی جاسکتی ہے۔

(جاری ہے)

اُنہوں نے کہا کہ پاکستان کو اللہ نے قدرتی حسن سے نوازا ہے جو دنیا بھر کے سیاحوں کے لیے توجہ کا مرکز ہے ۔

گورنر پنجاب نے کہا کہ فوڈ اور ٹورازم کا آپس میں گہرا تعلق ہے۔اُنہوں نے کہا کہ سیاحت کا فروغ پاکستان کا دنیا بھر میں مثبت تصور اجاگر کرنے میں مددگار ثابت ہو رہا ہے۔گورنر پنجاب نے کہا کہ پاکستان میں سی ای او برین ڈیزائنر راجہ رف جیسے نوجوانوں کی ضرورت ہے جو سیاحت اور فوڈ انڈسٹری کے فروغ کے لیے کام کر رہے ہیں۔اُنہوں نے مزید کہا کہ بھارت کو معرکہ حق میں ہم سب نے مل کر شکست دی ہے۔

گورنر پنجاب نے کہا کہ پا کستان امن پسند ملک ہے مگر اس کو کمزوری نہ سمجھا جائے۔ اُنہوں نے کہا کہ پاکستان اپنے ہمسایہ ممالک کے ساتھ امن کا خواہاں ہے مگر اپنی سالمیت پر سمجھوتہ نہیں کرے گا۔گورنر پنجاب سردار سلیم حیدر خان نے کہا کہ سستی بجلی کے لیے اقدامات کی ضرورت ہے تاکہ کاروباری طبقے کو ریلیف ملے۔اُنہوں نے کہا کہ موجودہ شدید بارشوں اور سیلاب کی صورتحال میں عوام سیاحتی مقامات پر جانے سے گریز کریں۔

گورنر پنجاب نے کہا کہ بونیر،گلگت سمیت شمالی علاقہ جات میں سیلابی ریلوں نے شدید نقصان پہنچایا ہے۔اُنہوں نے کہا کہ لوگوں کے گھر،مال، مویشی اور قیمتی سامان سیلاب میں بہہ گئے۔سیلاب متاثرین اس وقت مدد کے منتظر ہیں۔گورنر پنجاب نے کہا کہ پاک فوج ، پی ڈی ایم اے اور حکومت دن رات سیلاب متاثرین کی مدد کے لئے کوشاں ہے۔اُنہوں نے کہا کہ مخیر حضرات سے اپیل ہے کہ وہ اس مشکل اور مصیبت کی گھڑی میں سیلاب متاثرین کی بڑھ چڑھ کر مدد کریں۔