ایم اے جناح روڈ پرپٹاخوں کے گودام میں دھماکہ کی انکوائری کی جائے گی ، سینیٹر وقار مہدی

جمعرات 21 اگست 2025 20:40

کراچی (اُردو پوائنٹ اخبارتازہ ترین - اے پی پی۔ 21 اگست2025ء) وزیراعلیٰ سندھ کے معاونِ خصوصی برائے چیف منسٹر انسپیکشن ٹیم و پاکستان پیپلز پارٹی سندھ کے جنرل سیکرٹری سینیٹر وقار مہدی نے کہا ہے کہ ایم اے جناح روڈ پر واقع پٹاخوں کے گودام میں دھماکہ کے معاملہ کی انکوائری کی جائے گی اور ذ مہ داروں کے خلاف سخت کارروائی کی جائے گی۔ جمعرات کو جاری اعلامیہ کے مطابق ان خیالات کا اظہار انہوں نے شہید محترمہ بینظیر بھٹو ٹراما سینٹر میں واقعہ کے زخمیوں کی عیادت کے بعد میڈیا سے گفتگو کرتے ہوئے کیا۔

(جاری ہے)

سینیٹر وقار مہدی کو ٹراما سینٹر کے ایگزیکیوٹو ڈائریکٹر ڈاکٹر صابر میمن نے زخمیوں کے علاج معالجہ کے حوالہ سے آگاہ کیا۔ انہوں نے بتایا کہ ایم اے جناح روڈ پر واقع پٹاخوں کے گودام میں دھماکہ کے14زخمی ٹراما سینٹر لائے گئے جن میں سے دو کی حالت تشویشناک ہے۔ انہوں نے بتایا کہ زخمیوں میں زیادہ تر مزدور طبقہ اورورکرز ہیں۔ سینیٹر وقارمہدی نےہسپتال انتظامیہ کو ہدایات دیں کہ زخمیوں کو بہتر سے بہتر طبی سہولیات فراہم کی جائیں۔ انہوں نے کہا کہ معاملہ کی انکوائری کی جائے گی کہ کس نے بلڈنگ میں پٹاخوں کا گودام قائم کرنے کی اجازت دی ۔انہوں نے کہا کہ دھماکہ کی وجوہات کا جائزہ لیا جا رہا ہے ۔