ایشیائی ترقیاتی بینک نے ریکوڈک منصوبے کیلئے 41کروڑڈالر کا پیکیج منظور کرلیا

منصوبے سے 2028کے بعد تانبا اور سونا حاصل ہونا شروع ہوگا، جس سے تقریباً 70ارب ڈالر کا فری کیش فلو پیدا ہوگا،اعلامیہ

جمعہ 22 اگست 2025 12:53

ایشیائی ترقیاتی بینک نے ریکوڈک منصوبے کیلئے 41کروڑڈالر کا پیکیج منظور ..

اسلام آباد(اُردو پوائنٹ اخبارتازہ ترین - این این آئی۔ 22 اگست2025ء)ایشیائی ترقیاتی بینک نے ریکو ڈک (پاکستان کے تانبے اور سونے کے بڑے منصوبی)کیلئی410ملین ڈالر مالیت کی فنڈنگ کے پیکیج کی منظوری دیدی۔اے ڈی بی کے اعلامیے کے مطابق یہ منصوبہ دنیا کے سب سے بڑے غیر استعمال شدہ معدنی ذخائر میں سے ایک ہے، جسے بیرک گولڈ آپریٹ کرے گا۔ فنڈنگ میں 2قرضے شامل ہیں، جن کی مالیت 300ملین ڈالر ہے،جبکہ 110ملین ڈالر کی مالی ضمانت حکومت پاکستان کیلئے دی جائے گی۔

ریکو ڈک منصوبے سے 2028کے بعد تانبا اور سونا حاصل ہونا شروع ہوگا، جس سے تقریباً 70ارب ڈالر کا فری کیش فلو پیدا ہوگا۔ منصوبے کی مجموعی لاگت 6.6ارب ڈالر ہے ،جس میں 50فیصد حصہ بیرک گولڈ جب کہ بقیہ وفاقی اور صوبائی حکومتوں کے پاس ہے۔

(جاری ہے)

پاکستان کو امید ہے کہ یہ منصوبہ معدنی شعبے میں مزید غیر ملکی سرمایہ کاری کیلئے ایک سنگ میل ثابت ہوگا۔ اس میں امریکا سمیت دیگر ممالک کی کمپنیاں بھی دلچسپی ظاہر کر چکی ہیں۔

ریکو ڈک منصوبہ ماضی میں کئی سال قانونی تنازعات کا شکار رہا، تاہم 2022 میں ان مسائل کا حل نکال لیا گیا۔منصوبے کے پہلے مرحلے میں سالانہ 2لاکھ میٹرک ٹن تانبا پیدا کرنے کا ہدف ہے جو توسیع کے بعد 4لاکھ ٹن تک بڑھایا جائے گا۔ بیرک گولڈ کے مطابق منصوبے کی عمر 37سال سے زیادہ بھی ہو سکتی ہے، اگر مزید اپ گریڈ اور نئی دریافتیں کی جائیں۔