گورنر خیبرپختونخوا کی برسلز میں عالمی فلاحی ادارے "ہینڈ ان ہینڈ انٹرنیشنل" کی سربراہ سے ملاقات

عالمی برادری اور بین الاقوامی فلاحی اداروں کو موسمیاتی تبدیلی کے اثرات سے نمٹنے کیلئے مشترکہ حکمتِ عملی اپنانا ہوگی،فیصل کریم کنڈی

ہفتہ 23 اگست 2025 20:50

پشاور(اُردو پوائنٹ اخبارتازہ ترین - این این آئی۔ 23 اگست2025ء) گورنر خیبرپختونخوا فیصل کریم کنڈی نے برسلز میں عالمی فلاحی ادارے "ہینڈ ان ہینڈ انٹرنیشنل" کی سربراہ کرس بنز سے ملاقات کی، ملاقات میں خیبرپختونخوا میں حالیہ سیلاب اور اس کے نتیجے میں ہونے والے جانی و مالی نقصانات پر تفصیلی گفتگو کی گئی۔ گورنر خیبرپختونخوا نے کہا کہ پاکستان موسمیاتی تبدیلیوں کے باعث شدید خطرات کا سامنا کر رہا ہے، ملک میں سیلاب، کلائوڈ برسٹ اور دیگر قدرتی آفات نے ہزاروں خاندانوں کو متاثر کیا ہے۔

انہوں نے کہا کہ صرف خیبرپختونخوا میں بادل پھٹنے کے واقعات کے نتیجے میں چار سو سے زائد افراد جاں بحق ہو چکے ہیں۔ فیصل کریم کنڈی نے زور دیا کہ عالمی برادری اور بین الاقوامی فلاحی اداروں کو موسمیاتی تبدیلی کے اثرات سے نمٹنے کیلئے مشترکہ حکمتِ عملی اپنانا ہوگی۔

(جاری ہے)

انہوں نے بطور سربراہ انجمن ہلالِ احمر یقین دہانی کرائی کہ عالمی اداروں کی فراہم کردہ امداد شفافیت کے ساتھ حق دار متاثرین تک پہنچائی جائے گی۔

فیصل کریم کنڈی نے ہینڈ ان ہینڈ انٹرنیشنل کی ماضی میں سیلاب اور زلزلہ متاثرین کیلئے دی گئی خدمات کو سراہتے ہوئے کہا کہ پاکستان ان کا شکر گزار ہے۔ گورنر فیصل کریم کنڈی نے اس موقع پر مقبوضہ جموں و کشمیر میں انسانی حقوق کی خلاف ورزیوں کو عالمی فورمز پر اجاگر کرنے پر کرس بنز کا شکریہ ادا کیا اور انہیں پاکستان کے دورے کی دعوت بھی دی۔ کرس بنز نے ملاقات کے دوران سیلاب متاثرین کی بحالی کیلئے ہر ممکن تعاون کی یقین دہانی کرائی اور کہا کہ پاکستان موسمیاتی تبدیلیوں کا شکار ملک ہے۔ انہوں نے کہا کہ پاکستان کا موسمیاتی تبدیلی کے حوالے سے مقدمہ نہایت مضبوط ہے اور عالمی اداروں کو آگے بڑھ کر پاکستان کی مدد کرنی چاہیے۔