احد چیمہ سے ایشیائی ترقیاتی بینک کے صدر کی ملاقات

اسلام آباد(اُردو پوائنٹ اخبارتازہ ترین - این این آئی۔ 28 اگست2025ء)ایشیائی ترقیاتی بینک کے صدر مساتو کاندا نے وفاقی وزیر اقتصادی امور احدچیمہ سے ملاقات کی۔ وفاقی وزیر نے ان کے دورے کو پاکستان اور اے ڈی بی کے درمیان دیرپا اور قابل اعتماد شراکت داری کی عکاسی قرار دیا، جو کہ برسوں سے ملک کی ترقیاتی ترجیحات کی حمایت میں اہم کردار ادا کر رہی ہے۔

احد چیمہ نے اسلام آباد میں اے ڈی بی کی نئی دفتری عمارت کے آغاز پر بھی مبارکباد دی، جو کہ پاکستان کے ساتھ بینک کے قریبی اور طویل المدتی تعلقات کا ایک اور سنگ میل ہے۔وفاقی وزیر احد چیمہ نے ملک میں معاشی استحکام اور کریڈٹ ریٹنگ میں بہتری کا ذکر کرتے ہوئے کہا کہ گزشتہ سال سابق صدر اے ڈی بی کے دورے کے دوران 2 بلین ڈالر کے اضافی فنڈز پر اتفاق ہوا تھا، انہوں نے درخواست کی کہ اب مثبت معاشی صورتحال کو دیکھتے ہوئے سالانہ قرض کی حد کو بڑھانے کی ضرورت ہے۔

(جاری ہے)

میٹنگ کے دوران سیکرٹری ریلوے نے ایم ایل ون منصوبے کے حوالے سے ایک پریزنٹیشن دی، جس میں صدر اور ان کی ٹیم کو منصوبے کے دائرہ کار اور مالیاتی ضروریات سے آگاہ کیا گیا۔ وفاقی وزیر احد چیمہ نے امید ظاہر کی کہ اے ڈی بی ایم ایل ون منصوبے کے لئے مرحلہ وار تعاون فراہم کرے گا۔ انہوں نے ایم ایل ون منصوبے پر عملدرآمد کے لیے پروسیسنگ کے وقت کو کم کرنے کی ضرورت پر بھی زور دیا دیتے ہوئے کہا کہ یہ منصوبہ نقل و حمل، تجارت اور علاقائی رابطوں کے لیے انتہائی اہم ہے۔

احد چیمہ نے صدر اے ڈی بی سے درخواست کی کہ وہ کریڈٹ گارنٹی کے فریم ورک میں اصلاحات پر غور کریں، خاص طور پر اس حوالے سے کہ فنڈز کیسے استعمال کیے جاتے ہیں۔ وفاقی وزیر نے کلائمیٹ (موسمیاتی)فنانس میں اضافے کی اہمیت پر زور دیتے ہوئے کہا کہ سیلاب اور ہنگامی حالات پر وسائل زیادہ صرف ہونے کی وجہ سے دیگر اہم ترقیاتی شعبے متاثر ہوتے ہیں۔ صدر مساتو کاندا نے حالیہ تباہ کن مون سون بارشوں اور سیلاب سے متاثرہ افراد اور جانی نقصان پر گہرے دکھ کا اظہار کیا۔

انہوں نے پاکستان کی حالیہ معاشی استحکام اور اصلاحاتی کوششوں کو سراہا اور ملک کی ترقیاتی کوششوں میں طویل مدتی شراکت دار رہنے کے عزم کا اعادہ کیا۔ انہوں نے بتایا کہ پاکستان اے ڈی بی کا بانی رکن ہے اور اس کے سب سے بڑے پانچ قرض لینے والوں میں شامل ہے۔ انہوں نے مالی سال 2024-25میں 2.2بلین امریکی ڈالر کی ریکارڈ ترسیلات حاصل کرنے پر اقتصادی امور ڈویژن اور اے ڈی بی کی ریزیڈنٹ مشن ٹیم کی قابل ستائش کوششوں کی بھی تعریف کی۔

صدر اے ڈی بی نے یقین دلایا کہ کریڈٹ ریٹنگز میں مزید بہتری کے بعد قرض کی حدود پر نظرثانی کی جائے گی۔ اس کے علاوہ، انہوں نے ایم ایل ون کی تزویراتی اہمیت کو تسلیم کرتے ہوئے اس کی حمایت کا عندیہ دیا۔ اجلاس کے اختتام پر وفاقی وزیر احد چیمہ اور صدر مساتو کاندا کی موجودگی میں ایشیائی ترقیاتی بینک اور سی ڈی اے کے درمیان ایک معاہدے پر دستخط ہوئے، اس معاہدے کے تحت، سی ڈی اے اسلام آباد میں نئی دفتری عمارت کی تعمیر کے لیے اے ڈی بی کو زمین فراہم کرے گی۔