ہماری نالائقی ہے کہ ہم ڈیمز نہیں بنا سکے، گورنر پنجاب

ڈیمز سے متعلق ایمرجنسی نافذ کرنی چاہیئے اور ہر طرف سے بجٹ کاٹ کر ڈیمز بنانے چاہئیں؛ سردار سلیم حیدر خان کی میڈیا سے گفتگو

ساجد علی جمعرات 28 اگست 2025 13:18

ہماری نالائقی ہے کہ ہم ڈیمز نہیں بنا سکے، گورنر پنجاب

لاہور ( اُردو پوائنٹ اخبارتازہ ترین۔ 28 اگست 2025ء ) گورنر پنجاب سردار سلیم حیدر خان کا کہنا ہے کہ ہماری نالائقی ہے کہ ہم ڈیمز نہیں بنا سکے کیوں کہ اگر ڈیم بناتے تو سیلاب سے بچ جاتے اور سستی بجلی بھی میسر ہوتی۔ لاہور میں میڈیا سے گفتگو کرتے ہوئے انہوں نے کہا کہ کچھ ڈیمز شروع ہوئے ہیں اور مزید بھی چند چھوٹے چھوٹے ڈیمز بن رہے ہیں لیکن میں سمجھتا ہوں کہ ڈیمز سے متعلق ایمرجنسی نافذ کرنی چاہیئے اور ہر طرف سے بجٹ کاٹ کر ڈیمز بنانے چاہئیں کیوں کہ یہ ہماری نااہلی ہے کہ اب تک ہم ڈیمز نہیں بنا سکے۔

گورنر پنجاب کا مزید کہنا ہے کہ سیلابی صورت حال کے باعث ابھی ہمارے لیے مشکل ہے، ملک میں اس وقت سیلاب کی صورتحال ہے اور اس میں تمام اداروں نے مل کر کام کرنا ہے کیوں کہ 30 سال کے بعد اتنا زیادہ پانی آرہا ہے، اس حوالے سے انتظامیہ پوری طرح الرٹ ہے۔

(جاری ہے)

بتایا جارہا ہے کہ دریائے راوی میں سیلاب کے باعث ملحقہ آبادیوں سے انخلا کروا دیا گیا، لاہور کے علاقے تھیم پارک، چوہنگ سمیت دیگر رہائشی علاقوں میں سیلابی پانی داخل ہوا، اس حوالے سے اسسٹنٹ کمشنر (اے سی) رائیونڈ نے بتایا کہ 2 ہزار 500 گھروں کو خالی کروایا گیا ہے۔

دوسری طرف وزیراعظم شہباز شریف نے پنجاب کے سیلاب سے متاثرہ علاقوں کا دورہ کیا، اس دوران وزیراعظم اور وزیر اعلیٰ پنجاب مریم نواز نے سیلاب سے متاثرہ علاقوں کا فضائی جائزہ لیا، فضائی جائزے کے دوران چیئرمین این ڈی ایم اے لیفٹیننٹ جنرل انعام حیدر نے وزیراعظم کو پنجاب کے دریاؤں میں طغیانی اور زیر آب علاقوں میں ریسکیو آپریشن پر بریف کیا گیا، وزیراعظم اور وزیراعلیٰ مریم نواز کو نارووال میں سیلاب صورتحال کے حوالے سے تفصیلی بریفنگ دی جائے گی، جس پر وزیراعظم شہباز شریف نے فضائی جائزہ کے دوران سیلابی صورت حال سے بچاؤ اور ریلیف آپریشن میں ضروری اقدامات کی ہدایات دیں۔