Live Updates

تیانجن میں ایرانی صدر کی شہبازشریف سے ملاقات، سیلاب سے جانی نقصان پر اظہار افسوس

ملاقات میں مشترکہ تاریخ، ثقافتی ورثے اور عقیدے پر مبنی تعلقات کی مضبوط بنیادوں کو اجاگر کیاگیا

پیر 1 ستمبر 2025 14:28

تیانجن (اُردو پوائنٹ اخبارتازہ ترین - این این آئی۔ 01 ستمبر2025ء)چین کے شہر تیانجن میں وزیراعظم شہباز شریف نے ایرانی صدر مسعود پزشکیان سے ملاقات کی۔وزیر خارجہ اسحاق ڈار، فیلڈ مارشل سید عاصم منیر اور وفاقی وزرا بھی ملاقات میں موجود تھے۔ملاقات میں مشترکہ تاریخ، ثقافتی ورثے اور عقیدے پر مبنی تعلقات کی مضبوط بنیادوں کو اجاگر کیا۔ دونوں رہنماں نے مختلف شعبوں میں دوطرفہ تعاون کی صورتحال کا جائزہ لیا۔

ایرانی صدر پزشکیان نے ایران کے لیے پاکستان کی مسلسل حمایت کو سراہا اور باہمی دلچسپی کے مختلف شعبوں میں دوطرفہ تعاون کو بڑھانے کے لیے ایران کے عزم کا اعادہ کیا۔وزیراعظم شہباز شریف نے دونوں دوست ممالک کے درمیان سیاسی اور اقتصادی تعلقات کو مزید مضبوط بنانے کی اہمیت پر زور دیتے ہوئے ایران کے عوام اور حکومت کے ساتھ پاکستان کی غیر متزلزل یکجہتی کا بھی اعادہ کیا۔

(جاری ہے)

وزیراعظم نے علاقائی امن کے لیے پاکستان کے عزم کا اعادہ کیا اور مذاکرات اور سفارتکاری کو تنا ئومیں کمی اور استحکام کی جانب واحد قابل عمل راستہ قرار دیا۔ایرانی صدر نے پاکستان کے مختلف علاقوں میں جاری سیلابی صورتِ حال کے نتیجے میں قیمتی جانی اور مالی نقصان پر افسوس کا اظہار کرتے ہوئے کہا کہ مشکل کی اس گھڑی میں ایرانی حکومت اور عوام پاکستان کے ساتھ کھڑے ہیں۔