چیئرمین و ڈپٹی چیئرمین سینیٹ کا کوئٹہ میں بی این پی کے جلسے پر خودکش حملے میں جانی و مالی نقصان پر افسوس کا اظہار

بدھ 3 ستمبر 2025 10:30

اسلام آباد (اُردو پوائنٹ اخبارتازہ ترین - اے پی پی۔ 03 ستمبر2025ء) چیئرمین سینیٹ سید یوسف رضا گیلانی نے کوئٹہ میں بلوچستان نیشنل پارٹی (بی این پی) کے جلسے پر ہونے والے خودکش حملے کی شدید مذمت کرتے ہوئے قیمتی انسانی جانوں کے ضیاع پر گہرے رنج و غم کا اظہار کیا ہے۔بدھ کو سینیٹ سیکرٹریٹ سے جاری بیان کے مطابق چیئر مین سینٹ نے کہا کہ قومی یکجہتی اور سیاسی سرگرمیوں کے دوران دہشت گرد ی کی کارروائیوں کے نتیجے میں بےگناہ شہریوں کی جان جانا نہایت افسوسناک اور ناقابلِ برداشت ہے۔

یہ دراصل پاکستان میں سیاسی و جمہوری رواداری پر حملہ ہے تاہم دہشت گرد عناصر اپنے ناپاک عزائم میں کامیاب نہیں ہوں گے۔چیئرمین سینیٹ نے کہا کہ 2 اور 3 ستمبر 2025ء کی درمیانی شب ہونے والے اس خودکش حملے میں بی این پی کے کارکنوں سمیت متعدد شہری جان بحق اور درجنوں زخمی ہوئے جو پوری قوم کے لیے دلی صدمے کا باعث ہے۔

(جاری ہے)

انہوں نے لواحقین سے دلی ہمدردی اور تعزیت کا اظہار کرتے ہوئے مرحومین کے درجات کی بلندی اور زخمیوں کی جلد صحت یابی کے لیے دعا کی۔

چیئرمین سینیٹ نے اس افسوسناک سانحے کے دوران سابق وزیراعلیٰ بلوچستان اور بی این پی کے سربراہ سردار اختر مینگل کے قافلے کو بھی نشانہ بنائے جانے پر ان سے دلی ہمدردی و تعزیت کا اظہار کیا اور کہا کہ وہ دکھ کی اس گھڑی میں سردار اختر مینگل اور ان کے رفقاکے ساتھ کھڑے ہیں۔انہوں نے زخمیوں کو فوری اور بہترین طبی سہولیات فراہم کرنے کی ہدایت کی اور کہا کہ وفاقی و صوبائی حکومتیں قانون نافذ کرنے والے اداروں کے تعاون سے واقعہ کی شفاف، جامع اور بروقت تحقیقات یقینی بنائیں تاکہ ذمہ دار عناصر کو قانون کے کٹہرے میں لایا جا سکے۔

چیئرمین سینیٹ نے عوام سے اپیل کی کہ اس المناک سانحے کو سیاسی فوائد یا نقصان کا ذریعہ نہ بننے دیں بلکہ ملکی سلامتی اور قانون کی حکمرانی کے لیے اتحاد اور یکجہتی کا مظاہرہ کریں۔ڈپٹی چیئرمین سینیٹ، سیدال خان نے بھی اس المناک سانحے پر گہرے دکھ اور افسوس کا اظہار کرتے ہوئے کہا کہ مشکل کی اس گھڑی میں وہ متاثرہ خاندانوں اور سردار اختر مینگل کے دکھ میں برابر کے شریک ہیں۔ انہوں نے مرحومین کے لیے دعائے مغفرت اور زخمیوں کی جلد صحت یابی کی دعا کی۔