فلسطینی صدر کے مشیر کی سربراہی میں وفد کی سپیکر قومی اسمبلی سے ملاقات، غزہ میں اسرائیلی بربرت کی مذمت ،مسلم بھائیوں کی ہرمحاذ پر مدد کریں گے،سردار ایاز صادق

اسلام آباد (اُردو پوائنٹ اخبارتازہ ترین - اے پی پی۔ 05 ستمبر2025ء) سپیکر قومی اسمبلی سردار ایاز صادق سے فلسطینی صدر کے مشیر برائے مذہبی امور ڈاکٹر محمود صدیقی الہباش کی سربراہی میں کے وفد نے پارلیمنٹ ہائوس میں ملاقات کی جس میں وفاقی وزیر برائے مذہبی امور سردار محمد یوسف بھی شریک ہوئے۔قومی اسمبلی سیکرٹریٹ سے جاری بیان کے مطابق سردار ایاز صادق نے فلسطینی وفد کا پارلیمنٹ ہائوس آمد پر پرتپاک استقبال کیا اور کہا کہ امام مسجد اقصیٰ کو اپنے درمیان پا کر دلی مسرت ہوئی ۔

سپیکر نے غزہ میں انسانی حقوق کی سنگین خلاف ورزیوں پر اظہار مذمت کرتے ہوئے کہا کہ نہتے فلسطینیوں پر اسرائیلی جارحیت انسانی المیہ ہے، پرامید ہوں کہ ایک دن ہم سب مسجد اقصیٰ میں نماز جمعہ ادا کریں گے۔

(جاری ہے)

انہوں نے کہا کہ پاکستان مسئلہ فلسطین پر واضع موقف رکھتا ہے، پاکستان کی قومی اسمبلی نے مسئلہ فلسطین پر متعدد قراردادیں منظور کی ہیں، ایسا کوئی دن نہیں ہوتا کہ قومی اسمبلی اجلاس میں اسرائیلی جارحیت پر بحث نہ ہو، اسرائیل غزہ میں انسانی جانوں سے کھیل رہا ہے، یورپی ممالک میں اسرائیلی جارحیت کے خلاف عوام کی کثیر تعداد میں احتجاج کا سلسلہ خوش آئند ہے۔

سپیکر نے کہا کہ میں نے مسئلہ فلسطین پر سعودی شوریٰ کونسل کے چیئرمین اور متعدد سفارتکاروں سے بات کی ہے،غزہ میں معصوم بچوں و خواتین کا قتل عام عالمی برادری کے ضمیر کا امتحان ہے، مسئلہ فلسطین کے حل کے لئے آواز بلند کرنا محض دینی نہیں بلکہ انسانی اور اخلاقی فریضہ بھی ہے۔انہوں نے کہا کہ انسانی امداد کی راہ میں رکاوٹوں اور خوراک کو ہتھیار بنانا غیر انسانی فعل ہے، پاکستان ہر سطح پر فلسطینی بھائیوں کے ساتھ اخلاقی، سیاسی اور سفارتی محاذ پر کھڑا رہے گا۔

حالیہ سیلاب کے دوران فلسطین کی جانب سے اظہار یکجہتی پر سپیکر سردار ایاز صادق نے شکریہ ادا کیا۔فلسطینی وفد کے سربراہ صدر کے مشیر برائے مذہبی امور ڈاکٹر محمود صدیقی الہباش نے پاکستان کی مستقل اور اصولی حمایت پر اظہار تشکر کیا اور پاکستان میں حالیہ سیلاب سے ہونے والے جانی و مالی نقصانات پر گہرے دکھ اور افسوس کا اظہار کیا۔ انہوں نے کہا کہ غزہ کے عوام پاکستانی عوام کی یکجہتی اور ہمدردی کو قدر کی نگاہ سے دیکھتے ہیں، فلسطین کو فوری انسانی امداد، سفارتی حمایت اور اسرائیلی مظالم رکوانے کے لیے عالمی دبائو کی ضرورت ہے، پاکستان کی قومی اسمبلی کا دورہ ہمارے لئے باعث اعزاز ہے ، پاکستان فلسطینیوں کا دوسرا گھر ہے اور اسے مسلم امہ میں ممتاز حیثیت حاصل ہے، اسرائیل کئی دہائیوں سے فلسطنیوں کی نسل کشی کر رہا ہے۔

ڈاکٹر محمود صدیقی الہباش نے کہا کہ تمام مشکلات کے باوجود ہم پرامید ہیں کہ مسلم امہ کے تعاون سے فلسطین ضرور آزاد ہوگا، مسئلہ فلسطین پر پاکستان کے اصولی موقف کو سراہتے ہیں، پاکستان کی حکومت، سیاسی و عسکری قیادت اور علماء نے مسئلہ فلسطین کو ہمیشہ بھرپور طور پر اجاگر کیا ۔انہوں نے کہا کہ رواں ماہ اقوام متحدہ میں فلسطین کے دو ریاستی حل کےلئے کانفرنس منعقد ہو رہی ہے، امید ہے کہ پاکستان ہمیشہ کی طرح اس کانفرنس میں فلسطین کی بھرپور حمایت کرے گا۔

ان کا کہنا تھا کہ مسلم ممالک کے علاوہ دیگر متعدد ممالک بھی فلسطین کی حمایت کریں گے۔بعد ازاں سپیکر قومی اسمبلی کی دعوت پر فلسطین کے صدر کے مشیر برائے مذہبی امور نے پارلیمنٹ ہائوس کی جامع مسجد میں نماز جمعہ کا خطبہ دیااور امامت کرائی۔سپیکر قومی اسمبلی سردار ایاز صادق، وفاقی وزرا، اراکینِ پارلیمنٹ اور قومی اسمبلی و سینیٹ سیکرٹریٹ کے عملے کی کثیر تعداد نے امام مسجد اقصیٰ کی امامت میں نماز جمعہ ادا کی۔\932