وزیرِ اعظم محمد شہباز شریف قطر کے خلاف اسرائیلی جارحیت پر امیر قطر شیخ تمیم سے اظہار یکجہتی کےلئے دوحہ روانہ ہو گئے

جمعرات 11 ستمبر 2025 10:30

اسلام آباد (اُردو پوائنٹ اخبارتازہ ترین - اے پی پی۔ 11 ستمبر2025ء) وزیرِ اعظم محمد شہباز شریف قطر کے خلاف اسرائیلی جارحیت پر امیر قطر شیخ تمیم بن حمد الثانی، قطری شاہی خاندان اور قطری عوام سے اظہار یکجہتی کےلئے ایک روزہ دورے پر دوحہ روانہ ہو گئے۔

(جاری ہے)

جمعرات کو پی ایم آفس کے میڈیا ونگ سے جاری بیان کے مطابق نائب وزیرِ اعظم و وزیرِ خارجہ محمد اسحاق ڈار، وزیرِ دفاع خواجہ محمد آصف، وزیرِ اطلاعات و نشریات عطاء اللہ تارڑ اور معاون خصوصی طارق فاطمی وزیرِ اعظم کے وفد میں شامل ہیں ،وزیرِ اعظم دوحہ میں قطرکے امیر شیخ تمیم بن حمد الثانی سے ملاقات کریں گے اور دوحہ پر بلاجواز اسرائیلی جارحیت اور بین الاقوامی قوانین کے صریحاً منافی حملے کے تناظر میں قطری امیر اور قطری عوام سے یکجہتی کا اظہار کریں گے۔

قطر اور پاکستان کے درمیان دیرینہ تاریخی برادرانہ تعلقات ہیں جو مشترکہ مذہب اور اقدار پر مبنی ہیں، پاکستان نے قطر کا ہمیشہ ہر مشکل وقت میں ساتھ دیا اور دیتا رہے گا، اس کا اظہار وزیراعظم قطری امیر سے ملاقات میں کریں گے۔ ملاقات میں اسرائیل کے خطے کے مختلف ممالک پر بلاجواز حملوں اور مسلسل جارحیت کے ساتھ ساتھ علاقے میں امن کے قیام کےلئے مشاورت ہوگی۔\932