Live Updates

عوام کے ساتھ سختیاں کرنے والے لوگ بنگلہ د یش و نیپال جیسے انجام کو پہنچتے ہیں. بیرسٹرگوہر

برداشت کی بھی ایک حد ہوتی ہے، جب سختیاں بڑھیں گی تو دوریاں پیدا ہوں گی جس سے ریاست خطرے میں پڑتی ہے اور ریاست کا حسن ختم ہو جاتا ہے. صحافیوں سے گفتگو

میاں محمد ندیم جمعرات 11 ستمبر 2025 16:31

عوام کے ساتھ سختیاں کرنے والے لوگ بنگلہ د یش و نیپال جیسے انجام کو پہنچتے ..

پشاور(اردوپوائنٹ اخبارتازہ ترین-انٹرنیشنل پریس ایجنسی۔11 ستمبر ۔2025 )پی ٹی آئی کے چیئرمین بیرسٹرگوہر علی خان نے کہا ہے کہ عوام کے ساتھ سختیاں کرنے والے لوگ بنگلہ د یش و نیپال جیسے انجام کو پہنچتے ہیں پشاور ہائیکورٹ کے باہر صحافیوں سے گفتگو کرتے ہوئے انہوں نے کہا کہ سب سے اپیل کروں گا یہ سختیاں ختم کریں کیوں کہ عوام کی برداشت کی بھی ایک حد ہوتی ہے، جب سختیاں بڑھیں گی تو دوریاں پیدا ہوں گی جس سے ریاست خطرے میں پڑتی ہے اور ریاست کا حسن ختم ہو جاتا ہے، جو لوگ قابض ہوتے ہیں ان لوگوں کے ساتھ ایسا ہوتا ہے جس طریقے سے آپ نے حال ہی میں انجام دیکھا کہ چاہے وہ بنگلادیش ہے چاہے وہ نیپال ہے جہاں عوام کے ساتھ سختیاں کرنے سے لوگ ایسے انجام کو پہنچتے ہیں.

(جاری ہے)

بیرسٹر گوہر نے کہا کہ آزاد عدلیہ کیلئے ضروری ہے کہ ججز پر بھی دباو نہ ڈالا جائے، ججز کی بھی شکایات ہیں کہ ہمارے ساتھ انصاف نہیں ہوتا، پاکستان کی عدلیہ ہمیشہ سے متنازعہ رہی ہے لیکن 26 ویں ترمیم آزاد عدلیہ کی راہ میں سب سے بڑی رکاوٹ ہے، 26 ویں ترمیم سے آزاد عدلیہ کے نام پر ایک دھبہ لگ گیا ہے، 26 ویں آئینی ترمیم کے خلاف اپیلیں دائر ہوچکی ہیں اس کو دیکھا جائے. ان کا کہنا ہے کہ ہمارے ارکان کو غیرقانونی طریقوں سے سزائیں ہوئیں، اگر سیاسی تنا جاری رہا تو ریاست خطرے میں پڑ جائے گی، عمران خان عوام کیلئے قید میں ہیں، ایوان مضبوط ہو اس لیے کوشش کر رہے ہیں لیکن ہمارے لیے دروازے بند کر دیئے گئے ہیں، پنجاب میں سیلاب متاثرین کو بھی وہ سہولیات نہیں مل رہیں جو ملنی چاہیئے تھیں، اگر تنا ختم نہ ہوا تو ملک کو بڑا نقصان ہوگا، بنگلادیش اور نیپال کا حال سب کے سامنے ہیں، اس لیے میں اب بھی کہتا ہوں کہ سختیاں ختم کریں، میری دعا ہے کہ یہ چیزیں ختم ہوں تاکہ ملک درست راستے میں چل پڑے.