Live Updates

اسلام آباد ہائی کورٹ میں لاپتہ شہری کی بازیابی کیس کی سماعت 26 ستمبر تک ملتوی

جمعہ 12 ستمبر 2025 22:30

اسلام آباد (اُردو پوائنٹ اخبارتازہ ترین - آن لائن۔ 12 ستمبر2025ء)اسلام آباد ہائی کورٹ نے لاپتہ شہری عمر عبداللہ کی بازیابی سے متعلق درخواست پر سماعت 26 ستمبر تک ملتوی کر دی۔ کیس کی سماعت جسٹس محسن اختر کیانی نے کی، جس دوران انہوں نے اہم ریمارکس دیے۔جسٹس محسن اختر کیانی نے کہا کہ عجیب بات ہے، پہلے مسنگ پرسنز کو دہشت گرد کہو اور پھر ان کو پیسے دے دو۔

کیا حکومت پاکستان کے پاس اتنے لاپتہ افراد کو ادائیگی کے لیے بجٹ ہی کیا آئی ایم ایف کے ساتھ مل کر ادائیگیاں کی جائیں گی جبکہ آدھا پاکستان آج سیلاب میں ڈوبا ہوا ہی سماعت کے دوران عدالت نے لاپتہ شہری کے والد سے استفسار کیا کہ کیا انہیں امدادی رقم ادا کی گئی ہی جس پر انہوں نے بتایا کہ تاحال کوئی ادائیگی نہیں ہوئی۔

(جاری ہے)

سیکرٹری گمشدہ افراد انکوائری کمیشن نے عدالت کو بتایا کہ کابینہ نے اس مقصد کے لیے ایک خصوصی کمیٹی تشکیل دی ہے۔

جسٹس محسن اختر کیانی نے استفسار کیا کہ جبری گمشدہ افراد انکوائری کمیشن کی حیثیت کیا ہے، اور کیوں دو ماہ گزرنے کے باوجود ادائیگی نہیں ہو سکی۔ وزارت دفاع کے نمائندے نے عدالت کو آگاہ کیا کہ معاملہ فائنل کر کے وزارت داخلہ کو بھیج دیا گیا ہے، ادائیگی وزارتِ داخلہ نے کرنی ہے۔عدالت نے مزید ریمارکس دیے کہ "جنہیں دہشت گرد کہا گیا انہیں نہ گرفتار کیا گیا، نہ ٹرائل ہوا اور نہ ہی سزائیں دی گئیں، لیکن اب انہیں کروڑوں روپے ادا کیے جا رہے ہیں۔ بعد ازاں عدالت نے کیس کی مزید سماعت 26 ستمبر تک ملتوی کر دی۔