Live Updates

بی جے پی نے آمریت قائم کررکھی ہے، ترجمان اے اے پی

ہفتہ 13 ستمبر 2025 12:08

سرینگر (اُردو پوائنٹ اخبارتازہ ترین - اے پی پی۔ 13 ستمبر2025ء) بھارت کے غیر قانونی زیر تسلط جموں و کشمیر میں عام آدمی پارٹی(اے اے پی) نے وزیر اعلیٰ عمر عبداللہ سے اپیل کی ہے کہ وہ رکن اسمبلی معراج ملک کی گرفتاری سے ضلع ڈوڈہ میں پیدا ہونے والی کشیدہ صورتحال کا جائزہ لینے کے لیے علاقے کا دورہ کریں ۔اے اے پی نے تنظیم کے رہنما اور رکن اسمبلی معراج ملک کی کالے قانون پبلک سیفٹی ایکٹ کے تحت گرفتاری کے معاملے پر بحث کےلئے اسمبلی کا خصوصی اجلاس بلانے کا بھی مطالبہ کیا۔

کشمیر میڈیا سروس کے مطابق ا ے اے پی کے ترجمان مدثر حسن نے سرینگر میں کہا کہ پارٹی رہنمائوں کو ڈوڈہ نہیں جانے دیا جا رہا اور ان کی آواز دبانے کی کوشش کی جا رہی ہے۔ انہوں نے کہا کہ ہمارا وزیر اعلیٰ عمر عبداللہ سے مطالبہ ہے کہ وہ صورتحال کا جائزہ لینے کے لیے ڈوڈہ کا دورہ کریں ۔

(جاری ہے)

انہوں نے کہا کہ معراج ملک کی گرفتاری سے ڈوڈہ میں پیدا ہونے والی کشیدہ صورتحال پر بحث کیلئے اسمبلی کا ہنگامی اجلاس بلانے کی بھی ضرورت ہے۔

انہوں نے کہا کہ یہ بی جے پی کی آمریت ہے کہ عام آدمی کی آواز کو کچلا جا رہا ہے ۔انہوں نے کہا کہ میڈیا ہائوسز کو ہدایت کی جا رہی ہے کہ وہ ہمیں کور نہ کریں ۔ مدثر حسن نے کہا کہ معراج ملک کی کالے قانون پبلک سیفٹی ایکٹ کے تحت گرفتاری جمہوری ملک ہونے کے بھارتی دعوئوں پر ایک بڑا سوالیہ نشان ہے۔یاد رہے کہ ڈوڈہ سے تعلق رکھنے والے معراج ملک کو سیلاب متاثرین کے تئیں انتظامیہ کے نارواسلوک کے خلاف آواز اٹھانے پر کالے قانون پبلک سیفٹی ایکٹ کے تحت گرفتار کیا گیا ہے۔

ان کی یہ گرفتاری نئی دہلی کے مسلط کردہ لیفٹیننٹ گورنر کے حکم پر عمل میں لائی گئی ہے۔ ڈوڈہ میں ان کی گرفتاری کے خلاف عوام نے شدید ردعمل ظاہر کیا ۔ انتظامیہ نے مظاہروں کو روکنے کیلئے سخت پابندیاں نافذ کر رکھی ہیں جبکہ مظاہروں کے دوران اب تک 80سے زائد افراد کو گرفتار کر لیا گیا ہے۔