عوامی وسائل کے دانشمندانہ استعمال کے عزم سے چیف جسٹس کی سکیورٹی کو معقول بنایا گیا ہے، ترجمان سپریم کورٹ

ہفتہ 13 ستمبر 2025 23:20

اسلام آباد (اُردو پوائنٹ اخبارتازہ ترین - اے پی پی۔ 13 ستمبر2025ء) ترجمان سپریم کورٹ نے کہا ہےکہ عوامی وسائل کے دانشمندانہ استعمال کے عزم سے چیف جسٹس کی سکیورٹی کو معقول بنایا ہے، چیف جسٹس پاکستان سمیت ججز کی سکیورٹی کو ریگولیٹ کیا گیا ہے، چیف جسٹس پروٹوکول میں سرکاری گاڑیوں کی تعداد 8 سے کم کرکے 2 کر دی ہے۔ترجمان سپریم کورٹ کے مطابق دیگر ججوں کے لیے حفاظتی نظام کو بھی مناسب طریقے سے منظم کیا گیا ہے، ریٹائرڈ ججز کی سکیورٹی بھی مروجہ قوانین، سکیورٹی پروٹوکولز اور استحقاق کے مطابق ریگولیٹ کی گئی ہے۔

(جاری ہے)

ترجمان سپریم کورٹ کا کہنا ہےکہ صدارتی حکم ریٹائرڈ ججوں کو تاحیات سکیورٹی فراہم کرتا ہے، ریٹائرڈ ججز ماضی میں حساس ڈیوٹی کرچکے ہوتے ہیں، مسلسل سیکیورٹی خدشات کو مدنظر رکھتے ہوئے سرکلر جاری کیا گیا تھا،سیکیورٹی پروٹوکولز کو عملی شکل دینےکے لیے سرکلر جاری کیا گیا تھا۔ترجمان سپریم کورٹ کے مطابق یہ سکیورٹی بغیرکسی غیر معمولی فائدہ، اضافی رعایت یا مراعات میں شامل نہیں، سرکلر اس لیے جاری کیا گیا کہ ضرورت سے زیادہ فورس کی تعیناتی نہ ہو۔ مقصد سپریم کورٹ، وزارت داخلہ اور صوبائی حکام کے درمیان ہم آہنگی یقینی بنانا تھا۔