جمہوریت عوام کی طاقت اور ملک کے روشن مستقبل کی ضمانت ہے،اسپیکر

اسلام آباد (اُردو پوائنٹ اخبارتازہ ترین - این این آئی۔ 14 ستمبر2025ء)اسپیکر قومی اسمبلی سردار ایاز صادق نے عالمی یومِ جمہوریت کے موقع پر پاکستان کے جمہوری عزم، پارلیمانی استحکام اور عوامی شمولیت کے تسلسل کو خراجِ تحسین پیش کرتے ہوئے کہاہے کہ جمہوریت عوام کی طاقت، اجتماعی دانش اور قومی ترقی و خوشحالی کی ضامن ہے، ، آج کا دن اٴْن تمام سیاسی کارکنوں، رہنماؤں اور صحافیوں کی قربانیوں کی یاد دلاتا ہے جنہوں نے جمہوریت کی بحالی اور بقا کیلئے جدوجہد کی۔

اسپیکر قومی اسمبلی نے کہا کہ پاکستان جمہوری جدوجہد کے نتیجے میں قائم ہوا اور آئین پاکستان ہر شہری کو برابری، مذہبی آزادی، اظہارِ رائے اور شراکتی سیاست کے بنیادی حقوق فراہم کرتا ہے۔ انہوں نے کہا کہ اسلام بھی مشاورت، باہمی رائے اور عوامی شمولیت کی تعلیم دیتا ہے اور انہی اصولوں کی روشنی میں جمہوری نظام عوامی نمائندگی پر قائم ہے۔

(جاری ہے)

اسپیکر سردار ایاز صادق نے کہا کہ پارلیمان عوامی امنگوں کا سپریم فورم ہے، جہاں قانون سازی، پالیسی سازی، اور حکومتی نگرانی کے ذریعے عوامی رائے کو عملی جامہ پہنایا جاتا ہے۔ انہوں نے کہا کہ پارلیمان کی بالادستی، آئین کی مکمل پاسداری، ادارہ جاتی ہم آہنگی اور عوامی فلاح و بہبود جمہوری استحکام کی ضمانت ہیں۔انہوں نے قائداعظم محمد علی جناحؒ کے 11 اگست کے تاریخی خطاب کا حوالہ دیتے ہوئے کہا کہ ہر شہری کو مذہبی آزادی حاصل ہے اور ریاست کا تعلق فرد کے مذہب، ذات یا عقیدے سے نہیں ہوتا۔

اسپیکر قومی اسمبلی نے سابق وزیرِ اعظم میاں محمد نواز شریف، سابق خاتون اول بیگم کلثوم نواز، سابق وزرائے اعظم شہید ذوالفقار علی بھٹو اور محترمہ بے نظیر بھٹو شہید سمیت دیگر سیاسی رہنماؤں کی ملک میں جمہوریت کی بحالی اور استحکام کے لیے قربانیوں اور جدوجہد کو خراج عقیدت پیش کیا۔اسپیکر سردار ایاز صادق نے کہا کہ جمہوری نظام حکومت عوام کو بااختیار بناتا ہے، اداروں کو جوابدہ کرتا ہے اور قومی ترقی کیلئے اجتماعی بصیرت فراہم کرتا ہے۔

انہوں نے کہا کہ آج کا دن اس عزم کی تجدید کا موقع ہے کہ ہم آئین، قانون، اور اداروں کے استحکام کے لیے اپنی جدوجہد جاری رکھیں گے۔ انہوں نے تمام سیاسی جماعتوں پر زور دیا کہ وہ باہمی اختلافات کو بالائے طاق رکھتے ہوئے قومی مفاد میں مشترکہ حکمتِ عملی اپنائیں۔انہوں نے نوجوانوں کی جمہوری عمل میں شرکت پر زور دیتے ہوئے کہا کہ قومی اسمبلی کی جانب سے شروع کیے گئے پارلیمانی اسٹڈیز پروگرام، انٹرن شپ پروگرامز، اور یوتھ پارلیمنٹرینز فورم جیسے اقدامات کا مقصد نوجوان نسل کو جمہوری عمل میں شامل کرنا اور قومی ترقی میں اٴْن کا کردار یقینی بنانا ہے۔

انہوں نے کہا کہ نوجوانوں کی شمولیت جمہوریت کو نتیجہ خیز اور پائیدار بنانے میں بنیادی کردار ادا کرے گی۔اسپیکر قومی اسمبلی نے کہا کہ پاکستان کی پارلیمان نے نہ صرف خواتین کے حقوق، مالیاتی شفافیت اور ماحولیاتی تحفظ جیسے اہم معاملات پر قانون سازی کی بلکہ وومنز پارلیمانی کاکس، پارلیمانی ٹاسک فورس برائے پائیدار ترقی کے اہداف (ایس ڈی جیز)، پارلیمانی کاکس برائے چائلڈ رائٹس اور ینگ پارلیمنٹرینز فورم جیسے پارلیمانی پلیٹ فارمز کے ذریعے بین الجماعتی تعاون کو فروغ دیا۔

انہوں نے کہا کہ یہ فورمز پارلیمان میں تمام سیاسی جماعتوں کی شراکت کو ممکن بناتے ہیں، جو شراکتی جمہوریت اور گڈ گورننس کی اصل روح ہے۔ڈپٹی اسپیکر قومی اسمبلی، سید غلام مصطفی شاہ نے بھی عالمی یوم جمہوریت کے موقع پر اظہار خیال کرتے ہوئے کہا کہ سابق وزرائے اعظم شہید محترم ذوالفقار علی بھٹو اور شہید محترمہ بے نظیر بھٹو کی جمہوریت کیلئے لازوال قربانیاں ہمارے لیے مشعلِ راہ ہیں۔

انہوں نے کہا کہ جمہوریت صرف ایک طرزِ حکمرانی نہیں بلکہ ایک نظریہ ہے جو عوامی حاکمیت، شہری آزادی اور آئینی بالادستی کو یقینی بناتا ہے۔ڈپٹی اسپیکر قومی اسمبلی نے کہا کہ پارلیمان ایک ایسا ادارہ ہے جہاں مختلف سیاسی نظریات رکھنے والے نمائندگان مل کر قانون سازی کرتے ہیں۔ انہوں نے تمام پارلیمانی کاکسز کے کردار کو سراہتے ہوئے کہا کہ بین الجماعتی مکالمہ اور مشاورت ہی جمہوریت کا اصل حسن ہے اور یہی راستہ پاکستان کے روشن اور پائیدار مستقبل کی طرف لے جاتا ہے۔