Live Updates

ورلڈ فوڈ پروگرام اور جنوبی پنجاب سیکرٹریٹ کا سیلاب متاثرہ اضلاع میں غذائی امداد کے لئے اشتراک

جمعرات 18 ستمبر 2025 22:07

ملتان (اُردو پوائنٹ اخبارتازہ ترین - اے پی پی۔ 18 ستمبر2025ء) جنوبی پنجاب کے سیلاب سے متاثرہ اضلاع میں بچوں اور خواتین کے لئے غذائی امداد کی فراہمی کے حوالے سے اہم پیش رفت سامنے آئی ہے۔جنو بی پنجاب سیکرٹریٹ اور اقوام متحدہ کے ورلڈ فوڈ پر وگرام کے درمیان اشتراک عمل پر اتفاق کیا گیا ہے۔ اس سلسلے میں ورلڈ فوڈ پروگرام کے پروگرام آفیسر جیک فرتھ پاول اور صوبائی ہیڈ ڈاکٹر عمارہ خان نے جنوبی پنجاب سیکرٹریٹ کا دورہ کیا اور ایڈیشنل چیف سیکر ٹری جنوبی پنجاب فواد ہاشم ربانی سے ملاقات کی۔

ایڈ یشنل چیف سیکرٹری فواد ہاشم ربانی نے گفتگو کرتے ہو ئے کہا کہ حکومت کا ہدف سیلاب متاثرین کے لئے ریلیف سرگرمیوں کو مزید تیز اور مؤثر بنانا ہے۔ انہوں نے یقین دہانی کرائی کہ جنوبی پنجاب سیکرٹریٹ ورلڈ فوڈ پرو گرام کے ساتھ بھرپور تعاون کرے گا تاکہ غذائی قلت کا شکار بچوں اور حاملہ و دودھ پلانے والی خواتین کو برو قت امداد مل سکے۔

(جاری ہے)

انہوں نے وزیراعلیٰ پنجاب مریم نواز شریف کی ہدایت کا حوالہ دیتے ہوئے بتایا کہ فلڈ ریلیف کیمپس میں بچوں کو دودھ فراہم کیا جا رہا ہے۔

ورلڈ فو ڈ پروگرام کے وفد نے بریفنگ میں بتایا کہ پہلے مرحلے میں یہ پروگرام ملتان، مظفرگڑھ، خانیوال اور بہاولپور میں شروع کیا جائے گا۔ اس دوران متاثرہ خاندانوں کو غذائیت سے بھرپور آٹا، دالیں اور گھی فراہم کیے جائیں گے، جبکہ حاملہ خواتین اور بچوں کے لئے فوڈ سپلیمنٹس اور ہائی انرجی بسکٹ بھی دیےجائیں گے۔ امداد نہ صرف کیمپس بلکہ گھروں تک بھی پہنچائی جائے گی تاکہ زیا دہ سے زیادہ متاثرہ آبادی کو سہولت فراہم کی جا سکے۔