پاکستان اور ازبکستان ٹیکنالوجی اور صنعت میں تعاون کے ذریعے اپنے تعلقات کو نئی بلندیوں تک لے جا سکتے ہیں،ہارون اخترخان

ازبکستان میں پاکستان کے فارماسیوٹیکل سیکٹر کی لائسنسنگ اور سرٹیفکیشن کے عمل کو مزید مؤثر بنانے کی ضرورت ہے، معاون خصوصی

جمعرات 18 ستمبر 2025 20:30

اسلام آباد (اُردو پوائنٹ اخبارتازہ ترین - این این آئی۔ 18 ستمبر2025ء)وزیراعظم کے معاون خصوصی برائے صنعت وپیداوارہارون اخترخان نے کہاہے کہ پاکستان اور ازبکستان ٹیکنالوجی اور صنعت میں تعاون کے ذریعے اپنے تعلقات کو نئی بلندیوں تک لے جا سکتے ہیں۔انہوں نے یہ بات ازبکستان کے دورہ کے دوران فارما پارک اورٹیکنوپارک کے دورے کے موقع پرکہی۔ معاون خصوصی نے دوطرفہ صنعتی اور تکنیکی تعاون کو فروغ دینے کے لئے ازبکستان کے فارما پارک اور ٹیکنو پارک کا دورہ کیا۔

دورے کے دوران ہارون اختر خان نے ازبک ٹیکنو پارک میں جدید گھریلو اور الیکٹرانک مصنوعات کی تیاری کو سراہا۔ انہوں نے زور دیا کہ سولر واٹر ہیٹرز کی مشترکہ تیاری دونوں ممالک کے لئے توانائی کے شعبے میں نہ صرف فائدہ مند ثابت ہوگی بلکہ عوام کو سستی توانائی بھی فراہم کرے گی۔

(جاری ہے)

اس موقع پر جدید گیس اور بجلی کے میٹرز کی مشترکہ تیاری پر بھی بات چیت ہوئی تاکہ توانائی اور ٹیکنالوجی کے شعبوں میں تعاون کو مزید فروغ دیا جا سکے۔

فارماسیوٹیکل کے شعبے میں تعاون کاذکرکرتے ہوئے انہوں نے کہاکہ ازبکستان میں پاکستان کے فارماسیوٹیکل سیکٹر کی لائسنسنگ اور سرٹیفکیشن کے عمل کو مزید مؤثر بنانے کی ضرورت ہے۔ انہوں نے کہا کہ فارما انڈسٹری کی استعداد بڑھانے سے نہ صرف برآمدات میں اضافہ ہوگا بلکہ اسے عالمی معیار سے ہم آہنگ بھی کیا جا سکے گا۔انہوں نے کہاکہ ٹیکنالوجی اور صنعت میں تعاون کے ذریعے پاکستان اور ازبکستان اپنے تعلقات کو نئی بلندیوں تک لے جا سکتے ہیں۔