Live Updates

سیلاب سے سب سے زیادہ پنجاب متاثر ہوا ،بجلی کے بل معاف ،کاشتکاروں کیلئے خصوصی پیکج دیا جائے‘ راجہ پرویز اشرف

منگل 23 ستمبر 2025 17:42

لاہور(اُردو پوائنٹ اخبارتازہ ترین - این این آئی۔ 23 ستمبر2025ء)سابق وزیر اعظم اور پاکستان پیپلز پارٹی وسطی پنجاب کے صدر راجہ پرویز اشرف نے کہا ہے کہ سیلاب سے سب سے زیادہ پنجاب متاثر ہوا ہے،ہمارامطالبہ ہے کہ بجلی کے بل معاف اور کاشتکاروں کیلئے خصوصی پیکج دیا جائے۔وہ پیپلز پارٹی لاہور کے زیر اہتمام پیپلز سیکرٹریٹ ماڈل ٹائون میں سیلاب متاثرین میں نقد رقم تقسیم کرنے کی تقریب سے خطاب کر رہے تھے۔

تقریب میں تھیم پارک،برکت کالونی،موہلنوال اور خالق نگر کے 100خاندانوں میں فی کس 10ہزار تقسیم کیے گئے۔ اس موقع پر رانا جمیل منج،چودھری ریاض ،رانا اشعر نثار ،شہزاد سعید چیمہ ،ثمینہ گھرکی،نرگس خان،امجد جٹ،آصف ناگرہ،منظر کھوکھر،بشری منظور مانیکا ،منیر ڈگرا،عائشہ غوری بھی موجود تھے۔

(جاری ہے)

راجہ پرویز اشرف نے کہا کہ پاکستان میں سیلاب سے لاکھوں لوگ متاثر ہوئے ہیں،گھر اور فصلیں تباہ،جانور بہہ گئے،اس نازک گھڑی میں ہم سب نے مل کر متاثرین کے دکھ کو اپنا دکھ سمجھنا اورمتاثرین کے پاس جا کر انے ے دکھ میں شریک ہونا ہو گا۔

انہوں نے کہا کہ پاکستانی بڑی بہادر قوم ہے،2007کے زلزلے کی طرح اب متاثرین سیلاب کی مدد کرنا ہو گی۔پیپلز پارٹی سیلاب متاثرین کیلئے ہر فورم پر آواز اٹھائے گی،کاشتکار کے حالات سب سے برے ہیں،کھیت اس قابل نہیں کہ وہاں کچھ بویا جا سکے۔پنجاب حکومت کا پیکج اچھی چیز ہے،ہماری دعائیں آپ سب کے ساتھ ہیں۔شہزاد سعید چیمہ نے کہا کہ ناگہانی آفت کا بحیثیت قوم مل کر مقابلہ کرنا ہو گا، موسمیاتی تبدیلی کا مقابلہ اور دریائوں کے اصل راستے پر تجاوزات کو روکنا ہو گا۔

انہوں نے کہا کہ پیپلز پارٹی متاثرین کے ساتھ کھڑی ہے اور کھڑی رہی گی۔شہزاد سعید چیمہ نے مطالبہ کیا کہ کاشتکار کا چولہا اگلے تین برس تک جلانے کا بندوبست کرنا ہو گا۔ثمینہ خالد گھرکی نے کہا کہ موجودہ حالات میں متاثرین کی جتنی بھی مدد کی جائے کم ہے،سیلاب زدہ علاقوں کی نہیں یہ ہم سب کی آزمائش ہے،فصلیں ختم،گھر پانی میں گھرے اور متاثرین بندوں پر بیٹھے ہیں۔انہوں نے مزید کہا کہ وزیراعظم سے اپیل کرتے ہیں کہ متاثرہ علاقوں کے 6ماہ کے بل معاف کیے جائیں اورمتاثرہ کاشتکاروں کو کھاد بیج کے قرضے واپس کرنے میں ایک سال کا ریلیف دیا جائے۔انہوں نے کہا کہ کوشش کریں گے کہ پارلیمنٹ کے فورم سے وزیر اعظم کے علم میں متاثرین کی مشکلات لائیں۔