بھارتی اپوزیشن رہنماؤں نے مودی حکومت کے بلند دعوؤں اور فریب کی خارجہ پالیسی کا پردہ چاک کر دیا،کھل کر تنقید جاری

بدھ 24 ستمبر 2025 12:26

اسلام آباد (اُردو پوائنٹ اخبارتازہ ترین - اے پی پی۔ 24 ستمبر2025ء) بھارتی اپوزیشن رہنماؤں نے وزیر اعظم نریندر مودی کے بلند دعوؤں اور فریب کی خارجہ پالیسی کا پردہ چاک کر دیا، مودی کے ذاتی تعلقات، تصویری نمائش اور دکھاوے پر مبنی سفارتکاری بے نقاب ہوگئی ،مودی کی ناکام خارجہ پالیسی کی بدولت بھارت عالمی سطح پر کمزور اور تنہائی کا شکار ہو گیا۔

تفصیلات کے مطابق بھارت کا نام نہاد شائننگ انڈیا اب صرف پابندیوں، تجارتی رکاوٹوں اور ویزا مسائل تک محدود ہے۔بھارتی اپوزیشن رہنماؤں نے مودی کے بلند دعوؤں اور فریب کی خارجہ پالیسی کا پردہ چاک کر دیا۔اپوزیشن رہنما اسد الدین اویسی نے کہا کہ آپ نے ہاؤڈی مودی اور نمستے ٹرمپ جیسی مہم سے کیا حاصل کیا، ایچ ون بی ویزا سے ہندوستانیوں کو نشانہ بنانا ثبوت ہے کہ امریکا کو ہماری کوئی پرواہ نہیں ۔

(جاری ہے)

کانگریس رہنمااروند کیجریوال نے کہا کہ کچھ تو کریں آخر 140 کروڑ عوام کا وزیر اعظم اتنا بے بس کیوں ہے ۔کانگریس رہنما ملیکارجن کھرگے نے کہا کہ ایچ ون بی ویزا رکھنے والے متاثرین میں سے 70 فیصد ہندوستانی ہیں،50فیصد ٹیرف سے 10شعبوں میں 21ہزار700 ارب روپے کے نقصان کا تخمینہ ہے ،چاہ بہار بندرگاہ سے استثنیٰ ختم ہونے سے ہمارے سٹریٹجک مفادات کا نقصان ہوا ہے ۔

کانگریس رہنما گورو گگوئی نے کہا کہ ایچ ون بی ویزا کے حالیہ فیصلے میں امریکا نے ہندوستان کے مستقبل کو نشانہ بنایا ،مودی کی خاموشی اور دکھاوا بھارتی شہریوں کےلئے نقصان دہ ثابت ہو رہاہے ۔ کپل سیبال نے کہا کہ ایچ ون بی ویزا پر عائد پابندیوں کے بعد ذاتی تعلق ، گلے ملنا اور اب کی بار ٹرمپ سرکار کہاں گیا،دکھاوے،جھوٹ، دھوکے اور تکبر پر چلنے والی مودی حکومت کی خارجہ پالیسی زمین بوس ہو چکی ہے،انتہا پسند مودی اپنی سیاسی بقا کےلئے بھارت سمیت پورے خطے کو تباہی کی طرف دھکیل رہا ہے۔\932