انجینئر رشید کو تہاڑ جیل میں سخت ہراساں کیا جا رہا ہے، اے آئی پی

جمعرات 25 ستمبر 2025 13:44

نئی دہلی(اُردو پوائنٹ اخبارتازہ ترین - این این آئی۔ 25 ستمبر2025ء) بھارت کے غیر قانونی زیر قبضہ جموںوکشمیر میں عوامی اتحاد پارٹی (اے آئی پی) نے کہا ہے کہ نئی دہلی کی تہاڑ جیل میں غیر قانونی طور پر نظر بند تنظیم کے کے صدر اور رکن بھارتی پارلیمنٹ انجینئر رشید کو سخت ہراساں کیا جا رہا ہے۔کشمیرمیڈیاسروس کے مطابق اے آئی پی نے سرینگر میں جاری ایک بیان میںکہا کہ جیل حکام نے انجینئر رشید کو 18 اور 19 ستمبر کوسخت ہراساں کیا ۔

(جاری ہے)

بیان میںکہا گیا کہ انجینئر رشید کو محض اس وجہ سے ہراساںکیا گیا کیونکہ انہوں نے تذلیل اور تشدد کا نشانہ بنانے کے حوالے سے جیل سپر نٹنڈنٹ کے خلاف اپنی شکایت واپس لینے سے انکار کر دیاہے۔پارٹی کے ترجمان انعام النبی نے کہا کہ سنگین جرائم میںملوث دو قیدیوں نے انجینئر رشید پر 31 اگست کو قاتلانہ حملہ کیا تھا۔ جیل سپر نٹنڈنٹ نے واقعے کی شکایت اعلیٰ حکام تک پہنچانے کے بجائے اسے دبانے کی کوشش کی ۔ جیل سپر نٹنڈنٹ نے انجینئر رشید کے وکیل ایڈووکیٹ حسنین خواجہ سے ملاقات نہیں کی اور انہیں ڈیڑھ گھنٹے سے زائد وقت تک انتظار کرایا۔ بعد ازاں اگلے روز نصف درجن اہلکا ر انجینئر رشید کے سیل میں داخل ہو گئے اور انہیں سخت ہراساں کیا۔