,پاکستان نے حالیہ جنگ میں بھارت کو منہ توڑ جواب دیا اور مودی کے تمام مذموم عزائم کو خاک میں ملا دیا،بیرسٹر ڈاکٹر محمد علی سیف

پشاور(اُردو پوائنٹ اخبارتازہ ترین - آن لائن۔ 25 ستمبر2025ء)وزیر اعلیٰ خیبر پختون خوا کے مشیر اطلاعات و تعلقات عامہ بیرسٹر ڈاکٹر محمد علی سیف نے کہا ہے کہ پاکستان نے حالیہ جنگ میں بھارت کو منہ توڑ جواب دیا اور مودی کے تمام مذموم عزائم کو خاک میں ملا دیا۔ انہوں نے کہا کہ پاکستان کی مسلح افواج نے اپنی جرات، بہادری اور پیشہ ورانہ صلاحیتوں سے دشمن کو واضح پیغام دیا ہے کہ پاکستان اپنی آزادی، خودمختاری اور سلامتی پر کبھی سمجھوتہ نہیں کرے گا۔

وہ نشتر ہال پشاور میں آپریشن بنیان المرصوص وکٹری سیلیبریشن کے سلسلے میں منعقدہ آل خیبر پختونخوا ملی نغمہ و ٹیبلوز مقابلے کی تقریب سے بطور مہمان خصوصی خطاب کر رہے تھے۔بیرسٹر ڈاکٹر سیف نے کہا کہ آج کی جنگ صرف میدانِ جنگ تک محدود نہیں بلکہ ففتھ جنریشن وار کی شکل میں ہر محاذ پر لڑی جا رہی ہے۔

(جاری ہے)

بھارت پاکستان کے خلاف پراپیگنڈے اور جھوٹے بیانیے کے ذریعے نوجوان نسل کو گمراہ کرنے کی کوشش کر رہا ہے، مگر پاکستانی قوم اور ہماری سیکیورٹی فورسز ان سازشوں کو کبھی کامیاب نہیں ہونے دیں گی۔

انہوں نے کہا کہ پاکستان کا بچہ بچہ حب الوطنی کے جذبے سے سرشار ہے۔ ہماری آنے والی نسلیں پاکستان کے دفاع کے لئے سیسہ پلائی دیوار ثابت ہوں گی۔ انہوں نے کہا کہ جو قوم اپنے شہداء کے لہو کی قدر کرے اور اپنے محسنوں کو یاد رکھے، اسے دنیا کی کوئی طاقت شکست نہیں دے سکتی۔بیرسٹر ڈاکٹر سیف نے خواتین کے کردار پر بھی روشنی ڈالی اور کہا کہ ہماری بہادر خواتین نے تعلیم، طب، سائنس، ابلاغیات کے ساتھ ساتھ پاک فوج اور ائر فورس میں بھی اپنی صلاحیتوں کا لوہا منوایا ہے۔

انہوں نے کہا کہ خواتین کی شمولیت اور قربانیاں ہمارے قومی اتحاد اور ترقی کی ضامن ہیں۔تقریب میں بچوں کے درمیان ملی نغموں اور ٹیبلوز کے رنگارنگ مقابلے ہوئے جن میں بچوں نے اپنے جذبے اور حب الوطنی کا بھرپور اظہار کیا۔ مشیر اطلاعات نے کامیاب طلبہ کو شیلڈز اور انعامات سے نوازا اور ان کے حوصلے بلند کئے۔ انہوں نے کہا کہ یہ ننھے پھول پاکستان کا روشن مستقبل ہیں جو دشمن کے تمام ناپاک عزائم کو ناکام بنائیں گے۔

شرکاء نے ملی نغموں اور ٹیبلوز کو زبردست انداز میں سراہا اور قومی جذبے سے لبریز ماحول میں تقریب اختتام پذیر ہوئی۔اختتام پر بیرسٹر ڈاکٹر سیف نے کہا کہ پاکستان کی اصل طاقت اس کا اتحاد، ایمان اور قربانی کا جذبہ ہے۔ پوری قوم اگر ایک ہو جائے تو دنیا کی کوئی طاقت ہمیں جھکا نہیں سکتی۔ انہوں نے اس عزم کا اعادہ کیا کہ خیبر پختونخوا کے عوام عمران خان اور وزیراعلی علی امین گنڈاپور کی قیادت میں پاکستان کی ترقی، خوشحالی اور سلامتی کے لئے ہر قربانی دینے کو تیار ہیں