ڈی ڈبلیو 
- صدر ٹرمپ سے مذاکرات میں فلسطینی ریاست کے قیام سے متعلق کوئی اتفاق رائے بالکل نہیں ہوا، نیتن یاہو
صدر ٹرمپ سے مذاکرات میں فلسطینی ریاست کے قیام سے متعلق کوئی اتفاق رائے بالکل نہیں ہوا، نیتن یاہو
اسرائیلی وزیر اعظم بینجمن نیتن یاہو نے کہا ہے کہ ان کی امریکی صدر ٹرمپ کے ساتھ ملاقات میں فلسطینی ریاست کے قیام سے متعلق کوئی اتفاق رائے نہیں ہوا۔
نیتن یاہو کی صدر ٹرمپ سے ملاقات کل پیر کے روز وائٹ ہاؤس میں ہوئی تھی۔یروشلم سے موصولہ رپورٹوں کے مطابق وزیر اعظم نیتن یاہو نے پیر 29 ستمبر کو وائٹ ہاؤس میں امریکی صدر سے اپنی ملاقات کے ایک دن بعد آج منگل کے روز واضح طور پر تردید کرتے ہوئے کہا کہ اس امریکی اسرائیلی سربراہی ملاقات میں فلسطینی ریاست کے قیام سے متعلق کوئی اتفاق رائے نہیں ہوا۔
(جاری ہے)
نیتن یاہو نے سوشل میڈیا پلیٹ فارم ٹیلیگرام پر اپنی ایک پوسٹ میں لکھا، ’’بالکل نہیں۔ اور یہ بات مجوزہ معاہدے کی دستاویز میں بھی نہیں لکھی گئی۔ ایک بات پوری طرح واضح کر دی گئی تھی: ہم فلسطینی ریاست کے قیام کے سخت مخالف ہیں۔‘‘
غزہ کے زیادہ تر علاقوں میں اسرائیلی فوج موجود رہے گی، نیتن یاہو
امریکی صدر ٹرمپ اور اسرائیل کے وزیر اعظم نیتن یاہو کی پیر کے روز وائٹ ہاؤس میں ملاقات کے بعد ڈونلڈ ٹرمپ نے غزہ پٹی میں جنگ بندی کے لیے جس امن منصوبے کا اعلان کیا تھا، اس کو بین الاقوامی سطح پر کافی زیادہ سراہا جا رہا ہے۔
بہت سے عرب ممالک اور یورپی یونین سمیت بین الاقوامی برادری نے اس تجویز پر عمل درآمد کے لیے اپنی طرف سے بھرپور تعاون کی پیشکش بھی کی ہے۔
تاہم اس منصوبے کے اعلان کے بعد اسرائیلی وزیر اعظم کی طرف سے دیے جانے والے بیانات غزہ کی جنگ میں ممکنہ فائر بندی کی راہ میں تاحال حائل رکاوٹوں کی طرف اشارہ بھی کرتے ہیں۔
ان میں سے ایک پہلو تو نیتن یاہو کا یہ بیان ہے کہ ان کی ڈونلڈ ٹرمپ کے ساتھ ملاقات میں فلسطینی ریاست کے قیام اور اس کو تسلیم کرنے سے متعلق سرے سے کوئی اتفاق رائے نہیں ہوا۔
اس کے علاوہ ان کا آج منگل ہی کے روز دیا جانے والا دوسرا بیان غزہ پٹی میں اسرائیلی فوج کی آئندہ موجودگی سے متعلق ہے۔نیتن یاہو نے صدر ٹرمپ کی طرف سے پیش کردہ غزہ امن منصوبے کی حمایت تو کی ہے، تاہم ساتھ ہی انہوں نے اب یہ بھی کہا ہے کہ ’’غزہ پٹی کے زیادہ تر حصوں میں اسرائیلی فوج آئندہ بھی موجود‘‘ رہے گی۔
غزہ میں فلسطینی ہلاکتوں کی مجموعی تعداد اب 66 ہزار سے زائد
سوشل میڈیا پلیٹ فارم ٹیلیگرام پر منگل 30 ستمبر کو پوسٹ کیے گئے اپنے ایک ویڈیو بیان میں اسرائیلی وزیر اعظم نے کہا، ’’ہم اب تمام یرغمالیوں کو واپس لائیں گے، زندہ اور بخیریت، جبکہ اسرائیلی فوج غزہ پٹی کے زیادہ تر حصوں میں موجود رہے گی۔
‘‘
