ملک بھر میں انسداد پولیو کی قومی مہم 13اکتوبر سے آغازہوگا،4کروڑ 50 لاکھ بچوں کو قطرے پلانے کا ہدف مقرر

پیر 6 اکتوبر 2025 16:31

اسلام آباد(اُردو پوائنٹ اخبارتازہ ترین - این این آئی۔ 06 اکتوبر2025ء) ملک بھر میں انسداد پولیو کی قومی مہم 13اکتوبر سے شروع ہو رہی ہے جو 19اکتوبر تک جاری رہے گی، اس دوران پانچ سال سے کم عمر کے 4 کروڑ 50 لاکھ سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ترجمان نیشنل ایمرجنسی آپریشنز سینٹر کے مطابق مہم کے دوران بچوں کی قوت مدافعت کو مضبوط بنانے کے لیے وٹامن اے کے سپلیمنٹ بھی دیے جائیں گے۔

انسداد پولیو مہم میں چار لاکھ سے زائد تربیت یافتہ پولیو ورکرز شریک ہوں گے جو ملک کے طول و عرض میں گھر گھر جا کر قطرے پلائیں گے۔ اس مہم کے دوران پنجاب کے 2کروڑ 30لاکھ سے زائد، سندھ کے 1کروڑ 6لاکھ سے زائد، خیبرپختونخوا کے 72لاکھ سے زائد، بلوچستان کے 26لاکھ سے زائد ، اسلام آباد کے 4لاکھ 60ہزار سے زائد ،آزاد کشمیر کی7لاکھ 60ہزار سے زائد اور گلگت بلتستان کے 2لاکھ 80 ہزار سے زائد بچوں کو پولیو کے قطرے پلائے جائیں گے۔

(جاری ہے)

ترجمان نے والدین سے اپیل کی ہے کہ وہ قومی مہم کے دوران اپنے بچوں کو پولیو سے بچاؤ کے قطرے ضرور پلائیں اور ٹیموں سے تعاون کریں۔ انہوںنے کہاکہ پولیو سے تحفظ صرف چند قطروں کی دوری پر ہے، ہر بچہ محفوظ، ہر بچہ صحت مند ہو یہی ہمارا مقصد ہے۔انہوں نے کہا کہ والدین حفاظتی ٹیکوں کا مکمل کورس بروقت مکمل کروا کر بچوں کو دیگر قابلِ تدارک بیماریوں سے بھی محفوظ رکھ سکتے ہیں۔ انہوںنے کہاکہ نیشنل ایمرجنسی آپریشنز سینٹر کی جانب سے تمام انتظامات مکمل کر لیے گئے ہیں اور مہم کی کامیابی کے لیے ضلعی، صوبائی و وفاقی سطح پر مربوط حکمت عملی اختیار کی گئی ہے۔ مزید معلومات یا شکایات کے لیے ہیلپ لائن 1166پر رابطہ کریں۔