پیپلز پارٹی کے سیکرٹری جنرل محمد ہمایوں خان سے پارٹی رہنمائوں کے وفد کی ملاقات، پارٹی کے تنظیمی معاملات پر گفتگو

بدھ 8 اکتوبر 2025 13:34

اسلام آباد (اُردو پوائنٹ اخبارتازہ ترین - اے پی پی۔ 08 اکتوبر2025ء) پاکستان پیپلز پارٹی کے رہنماؤں نے اس عزم کا اظہار کیا ہے کہ پیپلز پارٹی عوامی خدمت کی سیاست پر یقین رکھتی ہے اور یہی وژن ہم پورے ملک میں لے کر آگے بڑھیں گے۔ بدھ کو پی پی پی میڈیا سیل سے جاری بیان کے مطابق پاکستان پیپلز پارٹی کے سیکرٹری جنرل محمد ہمایوں خان سے سینیٹر وقار مہدی، سینیٹر مسرور احسن اور رکن سندھ اسمبلی احمد علی ، پیپلز پارٹی بنوں ڈویژن کے جنرل سیکرٹری سرفراز خان، سینئر نائب صدر جاوید مروت اور بنوں سٹی کے صدر طارق سکندری نے ملاقات کی، ملاقات میں ملکی اور صوبائی سیاسی صورتحال، پارٹی امور اور تنظیمی معاملات پر تفصیلی گفتگو کی گئی۔

اس موقع پر پیپلز پارٹی کے رہنمائوں نے کہا کہ پارٹی عوامی خدمت کی سیاست پر یقین رکھتی ہے اور یہی وژن ہم پورے ملک میں لے کر آگے بڑھائیں گے۔

(جاری ہے)

پاکستان پیپلز پارٹی کے سیکرٹری جنرل محمد ہمایوں خان نے کہا کہ پیپلز پارٹی وفاق کی علامت ہے، جس نے ہمیشہ جمہوریت، عوامی حقوق اور صوبوں کے درمیان ہم آہنگی کے لیے جدوجہد کی ہے، سندھ حکومت کی کارکردگی عوامی خدمت کی روشن مثال ہے۔

پاکستان پیپلز پارٹی ہی واحد جماعت ہے جو عوامی مسائل کے حل اور جمہوری استحکام کی ضمانت ہے۔ چیئرمین بلاول بھٹو زرداری کی قیادت میں پارٹی کو مزید منظم و فعال بنایا جا رہا ہے۔ محمد ہمایوں خان نے کہا کہ ملک میں امن و امان کا قیام سب سے بڑی ترجیح ہونی چاہیے تاکہ عوام سکون اور اعتماد کے ساتھ اپنی زندگی گزار سکیں۔اس موقع پر سینیٹر وقار مہدی نے کہا کہ سندھ حکومت کی کارکردگی پیپلز پارٹی کے وژن کی عکاس ہے، سندھ حکومت نے تعلیم، صحت، زراعت اور عوامی فلاح کے میدان میں عملی اقدامات اٹھا کر دیگر صوبوں کے لیے مثال قائم کی ہے، پیپلز پارٹی وفاق کی علامت ہے اور ہمیشہ عوامی حقوق، جمہوریت اور صوبوں کے درمیان ہم آہنگی کے لیے جدوجہد کرتی آئی ہے۔

سینیٹر مسرور احسن نے کہا کہ سندھ حکومت کے ترقیاتی منصوبے اس بات کا ثبوت ہیں کہ پیپلز پارٹی اقتدار نہیں بلکہ خدمت کی سیاست کرتی ہے۔