8 اکتوبر 2005ء زلزلہ کے شہداء کی یاد میں ڈسٹرکٹ کمپلیکس آٹھ مقام میں دعائیہ تقریب کاانعقاد

نیلم (اُردو پوائنٹ اخبارتازہ ترین - این این آئی۔ 08 اکتوبر2025ء) 8اکتوبر 2005ء زلزلہ کے شہداء کی یاد میں ڈسٹرکٹ کمپلیکس آٹھ مقام میں دعائیہ تقریب کاانعقاد کیاگیا۔ 8بج کر52منٹ پر سائرن بجاکر 1منٹ کی خاموشی اختیار کی گئی۔شرکاء تقریب نے زلزلہ 2005کے شہداء کوخراج تحسین پیش کیا۔ڈپٹی کمشنر ندیم احمد جنجوعہ (تمغہ امتیاز)نے دعائیہ تقریب سے خطاب کرتے ہوئے کہاکہ زلزلہ 2005سے مظفرآباد اور ہزارہ ڈویژن میں ناقابل تلافی نقصان ہوا۔

حکومت پاکستان، پاکستانی عوام، بین الاقوامی برادری اور رفاہی تنظیموں کے تعاون سے آج آزادکشمیر میں شاندار تعمیروترقی موجود ہے۔ ہمیں کسی بھی لمحہ فطرت کے کسی بھی چیلنج سے آرام دہ ہوکر نہیں بیٹھنا ہوگا اگر ایسا کیاتو ہماری ترقی کاسفر ادھورا رہے گا۔

(جاری ہے)

زلزلہ، شدید سردی، کلاؤڈ برسٹ و دیگر طوفان جیسی قدرتی آفات سے نمٹنے کیلئے آج الحمداللہ ہم پہلے سے زیادہ مستعد ہیں۔

آج سے 20 سال قبل زلزلہ نے ہمیں چیلنج کیا تو ہمارے پاس کسی بھی ایمرجنسی سے نمٹنے کیلئے آلات نہ تھے 2005 میں بے سروسامانی کاعالم تھا۔ آج کا بچہ بچہ ڈی ڈی ایم اے سمیت ایسے تمام قواعد کاواقف ہے جو کسی بھی ایمرجنسی کیلئے استعمال کئے جاتے ہیں۔ ہمیں ہنر مند اور تربیت یافتہ افرادی قوت کی تیاری کی کوششیں جاری رکھنی چاہئیں، پاکستان کا شمار قدرتی آفات و سانحات سے متاثرہ ممالک میں ہوتا ہے۔

تعمیر نو،بحالی و آبادکاری وقت مانگتی ہے، دنیا بھر نے ہماری توقعات سے بڑھ کر متاثرین زلزلہ 2005کی معاونت کی جس پر ہم ان کیمشکور ہیں۔ قدرتی آفات کا مقابلہ ممکن تو نہیں مگر پیش بندی کرکے نقصانات میں کمی کی جاسکتی ہے۔ ڈپٹی کمشنر ندیم احمد جنجوعہ (تمغہ امتیاز) نے مزید کہاکہ 8اکتوبر2005کے سانحہ میں شہید ہونے والوں کو کبھی نہیں بھول سکتے،یہ ایک سانحہ تھا جب چندلمحوں میں ہر طرف تباہی پھیل گئی، زلزلے نے ہمیں صبر دیا۔

ڈپٹی کمشنر کاکہناتھاکہ زلزلہ متاثرہ علاقوں کی جس طرح بحالی و تعمیر نو کے عمل میں حصہ لیا اس کی مثال نہیں ملتی۔متاثرین زلزلہ کی بحالی کے لئے پاک فوج اور پاکستان قوم سمیت اسلامی ممالک نے جو ایثار و قربانی کی مثال قائم کی وہ ناقابل فراموش ہے۔8اکتوبر2005کے قیامت خیززلزلہ کی 20ویں برسی ڈسٹرکٹ کمپلیکس آٹھ مقام کے احاطہ میں منعقد کی جانیوالی تقریب میں سپرنٹنڈنٹ پولیس خواجہ محمد صدیق (تمغہ امتیاز)، صدر پریس کلب جاویداسداللہ، ڈائریکٹریونیورسٹی ڈاکٹر لعل حسین، اسسٹنٹ کمشنر ہیڈکوارٹر چوہدری بشارت، ڈسٹرکٹ فوڈ کنٹرولر سید شجاعت حسین نقوی، ڈپٹی ایجوکیشن آفیسر چوہدری نذیر، اسسٹنٹ فوڈ سیفٹی آفیسر خواجہ ممتاز، صدر انجمن تاجران آٹھ مقام بازار عبدالرشید اعوان، اسسٹنٹ ایجوکیشن آفیسر نسواں خواجہ منشاء انجم، انسٹرکٹر سول ڈیفنس رانا محمد مشکور اور ناصر بخاری نے ہمراہ انجمن ہلال احمر آزادکشمیر (نیلم) ٹیم سمیت دیگر محکمہ جات کے آفیسران / ملازمین باالخصوص بوائز ہائی سکول آٹھ مقام کے طلباء اساتذہ اور صحافیوں، سول سوسائٹی نے بھرپور شرکت کی۔

اِس موقع پر شہداء کی روح کے ایصال ِ ثواب کیلئے فاتحہ خوانی مملکت پاکستان کی سلامتی اور مقبوضہ کشمیر وفلسطین کی آزادی کیلئے دعامانگی گئی۔