وفاقی وزیربحری امورمحمد جنید انوار چوہدری کا سمندری کچھوؤں کے تحفظ کے لیے 9 کروڑ روپے مالیت کے منصوبے کا اعلان

اسلام آباد (اُردو پوائنٹ اخبارتازہ ترین - اے پی پی۔ 09 اکتوبر2025ء) وفاقی وزیر بحری امور محمد جنید انوار چوہدری نے جھینگا ماہی گیری کے دوران سمندری کچھوؤں کے تحفظ کے لیے 9 کروڑ روپے مالیت کے منصوبے کا اعلان کیا ہے۔ یہ منصوبہ سمندری حیاتیاتی تنوع کے تحفظ اور بحری وسائل کی پائیدار ترقی کو یقینی بنانے کی قومی کوششوں کا اہم حصہ ہے۔ جمعرات کو جاری بیان میں وفاقی وزیر نے بتایا کہ اس منصوبے کے تحت ماہی گیروں کو مفت "ٹرٹل ایکسکلوڈر ڈیوائسز" فراہم کی جائیں گی، جبکہ ان کی مؤثر تنصیب کے لیے تربیتی ورکشاپس، عملی تربیت اور ڈیٹا اکٹھا کرنے کے اقدامات بھی شامل ہیں۔

انہوں نے وضاحت کی کہ "ٹرٹل ایکسکلوڈر ڈیوائس" جھینگا پکڑنے والے جال میں نصب ایک مخصوص آلہ ہے جو سمندری کچھوؤں اور دیگر بڑی مخلوقات کو جال سے نکلنے کا راستہ فراہم کرتا ہے، جبکہ جھینگے جال میں رہتے ہیں۔

(جاری ہے)

جنید چوہدری کے مطابق جدید آلہ کی تنصیب سے نایاب سمندری کچھوؤں کے حادثاتی شکار میں نمایاں کمی آئے گی، ماہی گیروں کے جالوں کے نقصان اور جھینگے کے ضیاع میں بھی کمی ہوگی، اور پاکستان دوبارہ امریکہ کی جھینگا ایکسپورٹ سرٹیفکیشن حاصل کرنے کی سمت پیش رفت کرے گا۔

انہوں نے کہا کہ یہ منصوبہ پاکستان کے بین الاقوامی وعدوں اور سمندری پائیداری کے عالمی معیارات کے عین مطابق ہے، جس سے ملک کی ساکھ ایک ذمہ دار اور ماحول دوست سمندری خوراک برآمد کنندہ کے طور پر مزید مستحکم ہوگی۔ وفاقی وزیر نے بتایا کہ جھینگا ٹرالنگ کے دوران اکثر غیر متعلقہ سمندری جاندار بھی جال میں پھنس جاتے ہیں، جن میں کچھوے بھی شامل ہیں۔

جب یہ کچھوے سطح پر سانس لینے نہیں پہنچ پاتے تو اکثر ہلاک ہوجاتے ہیں۔ انہوں نے کراچی فش ہاربر اتھارٹی، سندھ فشریز ڈیپارٹمنٹ اور میرین فشریز ڈیپارٹمنٹ کو ہدایت دی ھے کہ اس جدید آلہ کی تنصیب کو فوری طور پر یقینی بنایا جائے۔جنید چوہدری نے خبردار کیا کہ منصوبے پر سو فیصد عملدرآمد اور شفاف نگرانی کو یقینی بنایا جائے گا، کیونکہ کسی بھی غفلت کی صورت میں پاکستان کی سمندری خوراک کی برآمدات کو عالمی مارکیٹوں میں مشکلات کا سامنا ہوسکتا ہے۔

اقتصادی پہلوؤں پر روشنی ڈالتے ہوئے انہوں نے بتایا کہ پاکستان کی جھینگا برآمدات اس وقت تقریباً 100 ملین ڈالر سالانہ ہیں، تاہم جدید ڈیوائس کے مکمل نفاذ کے بعد امریکہ سے دوبارہ سرٹیفکیشن حاصل ہونے کی صورت میں برآمدات میں تین گنا اضافہ ممکن ہے۔ اس سے یورپی یونین اور کینیڈا جیسی اعلیٰ منڈیوں تک رسائی بھی ممکن ہوگی۔ ان کے مطابق امریکی جھینگا مارکیٹ کا حجم تقریباً 6 ارب ڈالر سالانہ ہے۔

یہ منصوبہ ٹریڈ ڈیولپمنٹ اتھارٹی آف پاکستان، پاکستان فشریز ایکسپورٹرز ایسوسی ایشن، سندھ ٹرالر اونرز فشریز ایسوسی ایشن، کورنگی فش ہاربر اتھارٹی ، سندھ میرین فشریز ڈیپارٹمنٹ اور فشرمینز کوآپریٹو سوسائٹی کے تعاون سے شروع کیا جا رہا ہے۔ آخر میں وفاقی وزیر نے کہا کہ فی الحال پاکستان تقریباً 2 ڈالر فی کلو کے حساب سے جھینگا فروخت کرتا ہے، تاہم آلہ کے نفاذ اور بین الاقوامی سرٹیفکیشن کے بعد یہ قیمت 6 ڈالر فی کلو تک بڑھ سکتی ہے، جس سے امریکہ، یورپی یونین اور خلیجی ممالک میں برآمدات کے نئے مواقع پیدا ہوں گے۔