Live Updates

پاکستان اور افغانستان کےدرمیان کشیدگی ، بھارتی گودی میڈیا اپنے مذموم عزائم کےلئے فیک اور اے آئی کے ذریعے جعلی ویڈیوز بنانے میں مصروف

پیر 13 اکتوبر 2025 12:37

اسلام آباد (اُردو پوائنٹ اخبارتازہ ترین - اے پی پی۔ 13 اکتوبر2025ء) پاکستان اور افغانستان کےدرمیان کشیدگی کے دوران بھارت کا منفی پراپیگنڈا بے نقاب ہوگیا، بھارت کا گودی میڈیا پاک افغان کشیدگی میں جھوٹ اور پراپیگنڈے کے ذریعےایک بار پھر متحرک ہے۔ تفصیلات کے مطابق بھارت کا گودی میڈیا اپنے مذموم عزائم کےلئے فیک اور اے آئی کے ذریعے جعلی ویڈیوز بنانے میں مصروف ہے، گودی میڈیا نے شمالی وزیرستان کے شہری عادل داوڑ کو شہید قرار دے دیا ۔

شہری عادل داوڑنے ویڈیو پیغام میں خود تمام جھوٹے دعوؤں کو رد کرتے ہوئے کہا ہے کہ میرا نام عادل داوڑ ہے اور میں شمالی وزیرستان سے سیاسی و سماجی ورکر ہوں ، ہندوستانی میڈیا نے میری آرٹیفیشل انٹیلی جنس سے بنی تصویر چلائی ہے ۔

(جاری ہے)

ان کا کہنا تھا کہ اے آئی کے ذریعے مجھے وردی پہنا کر کہا گیا ہے کہ میں ایک میجر ہوں ، ہندوستانی میڈیا نے میری جعلی تصویر چلا کر کہا ہے کہ یہ پاک افغان بارڈر پر شہید ہوا ،میں شمالی وزیرستان کا ایک شہری ہوں ، بھارت کا پاکستان کےخلاف فیک پراپیگنڈا کرنا صحافت اور صحافتی اصولوں کی توہین ہے ۔

گودی میڈیا جھوٹی خبروں اور منظم پراپیگنڈے کےلئے حقائق کو مسخ کرنے کا تسلسل جاری رکھے ہوئے ہے ، پہلگام فالس فلیگ آپریشن کے دوران بھی گودی میڈیا جعلی تصاویر کے ذریعے جگ ہنسائی کرو ا چکا ہے۔