Live Updates

افغان طالبان کی جارحیت سے شہید12جوانوں کی چکلالہ چھانی میں نماز جنازہ ادا

نماز جنازہ میں فیلڈ مارشل ، وفاقی وزراء، گورنر خیبرپختونخوا، سول و عسکری حکام اور عوام کی شرکت پاکستان کی مسلح افواج، قوم کی مکمل حمایت کیساتھ، ملک کیخلاف کسی بھی جارحیت یا سازش کو ناکام بنانے کیلئے پرعزم،خواجہ آصف

پیر 13 اکتوبر 2025 21:15

راولپنڈی(اُردو پوائنٹ اخبارتازہ ترین - این این آئی۔ 13 اکتوبر2025ء) افغانستان کی بلااشتعال جارحیت کیخلاف وطن عزیز کا دفاع کرتے ہوئے شہید ہونے والے 12جوانوں کی نماز جنازہ ادا کردی گئی،نماز جنازہ میں فیلڈ مارشل سید عاصم منیر نے بھی شرکت کی۔آئی ایس پی آر کے مطابق 11اور 12اکتوبر 2025کی درمیانی شب افغان حکومت کی جانب سے کی گئی بلا اشتعال اور بزدلانہ جارحیت کے خلاف وطن عزیز کا دفاع کرتے ہوئے جام شہادت نوش کرنے والے 12جوانوں کی نماز جنارہ آج چکلالہ گیریژن، راولپنڈی میں ادا کی گئی۔

(جاری ہے)

نماز جنازہ میں فیلڈ مارشل سید عاصم منیر، وفاقی وزراء، گورنر خیبرپختونخوا، سول و عسکری حکام اور عوام کی بڑی تعداد نے شرکت کی۔اس موقع پر وزیر دفاع خواجہ آصف نے اپنے خطاب میں کہاکہ پاکستان کے عوام ان عظیم شہدا کے احسان مند ہیں جنہوں نے افغان طالبان حکومت اور بھارت کی حمایت یافتہ دہشت گرد تنظیموں کی بزدلانہ اور غدارانہ جارحیت کا مقابلہ کرتے ہوئے پاکستان کی علاقائی سالمیت کے دفاع میں اپنی جانوں کا نذرانہ پیش کیا۔انہوں نے کہا کہ پاکستان کی مسلح افواج، قوم کی مکمل حمایت کے ساتھ، ملک کے خلاف کسی بھی جارحیت یا سازش کو ناکام بنانے کے لیے پرعزم ہیں۔