خواجہ آصف سے برطانوی ہائی کمشنر کی ملاقات،باہمی دلچسپی کے امور، علاقائی سلامتی، دفاعی اور سٹریٹجک امور میں جاری تعاون پر تبادلہ خیال

پیر 13 اکتوبر 2025 21:30

اسلام آباد (اُردو پوائنٹ اخبارتازہ ترین - اے پی پی۔ 13 اکتوبر2025ء) وفاقی وزیر دفاع خواجہ محمد آصف نے پاکستان اور برطانیہ کے درمیان دوطرفہ تعلقات کو مزید گہرا کرنے کی پاکستان کی خواہش کا اظہار کیاہے۔پیر کو وزارت دفاع سے جاری بیان کے مطابق وزیر دفاع خواجہ محمد آصف سے پاکستان میں تعینات برطانوی ہائی کمشنر جین میریٹ نے یہاں ملاقات کی۔وزیر دفاع نے برطانوی ہائی کمشنر کا پرتپاک خیرمقدم کیا اور دونوں ممالک کے درمیان دوطرفہ تعلقات کو مزید گہرا کرنے کی پاکستان کی خواہش کا اظہار کیا۔

(جاری ہے)

ملاقات میں دونوں رہنماؤں نے باہمی دلچسپی کے امور، علاقائی سلامتی، دفاعی اور سٹریٹجک امور میں جاری تعاون پر تبادلہ خیال کیا۔دونوں اطراف نے متعدد شعبوں میں تعاون کو مضبوط بنانے کے اپنے عزم کا اعادہ کیا۔ملاقات کے دوران پاکستان انٹرنیشنل ایئرلائنز (پی آئی اے) کی برطانیہ کے لئے پروازوں میں اضافے کے ساتھ ساتھ دونوں ممالک کے درمیان فضائی رابطوں کو بڑھانے کے لئے اضافی ایئرلائنز کو شامل کرنے کے معاملے پر بھی تبادلہ خیال کیا گیا۔ملاقات میں تعمیری بات چیت جاری رکھنے اور پاکستان اور برطانیہ کے درمیان دیرینہ شراکت داری کو مزید مستحکم کرنے کے لئے مشترکہ مفاہمت ہوئی۔