ترکیہ اور آذربائیجان کے سپیکرز کی پنجاب اسمبلی آمد،دوطرفہ تعلقات اور پارلیمانی تعاون کے فروغ پر اتفاق

لاہور (اُردو پوائنٹ اخبارتازہ ترین - اے پی پی۔ 14 اکتوبر2025ء) گرینڈ نیشنل اسمبلی ترکیہ کے سپیکر پروفیسر ڈاکٹر نعمان کورتولموش اور آذربائیجان کی سپیکر صاحبہ غفاروا اپنے پارلیمانی وفود کے ہمراہ منگل کو پنجاب اسمبلی پہنچے، جہاں ان کا پرتپاک استقبال کیا گیا۔سپیکر پنجاب اسمبلی ملک محمد احمد خان، ڈپٹی سپیکر پنجاب اسمبلی ملک ظہیر اقبال چنڑ، اراکین اسمبلی سارہ احمد، اسما احتشام، رانا محمد ارشد، سیکرٹری جنرل چوہدری عامر حبیب اور سیکرٹری پارلیمانی امور خالد محمود نے معزز مہمانوں کا استقبال کیا۔

بعد ازاں سپیکر پنجاب اسمبلی نے دونوں برادر ممالک کے سپیکرز سے اسمبلی چیمبر میں ملاقات کی۔ ملاقات میں دوطرفہ تعلقات، تجارتی تعاون، دفاع، تعلیم اور توانائی سمیت مختلف شعبوں میں سٹریٹجک شراکت داری کے فروغ پر تبادلہ خیال کیا گیا۔

(جاری ہے)

اس موقع پر سپیکر پنجاب اسمبلی نے کہا کہ پاکستان، ترکیہ اور آذربائیجان کے عوام اخوت، دوستی اور محبت کے اٹوٹ رشتے میں منسلک ہیں۔

تینوں ممالک کی علاقائی سالمیت اور استحکام کے لئے مشترکہ کوششیں خطے میں ترقی و خوشحالی کا پیش خیمہ ثابت ہوں گی۔ انہوں نے کہا کہ تینوں ممالک کو دفاعی شعبے میں تعاون مزید بڑھانا چاہئے۔انہوں نے کہا کہ برادر ممالک ہر آزمائش اور چیلنج میں ہمیشہ ہمارے شانہ بشانہ کھڑے رہے ہیں جبکہ تینوں ریاستوں نے بین الاقوامی و علاقائی فورمز پر ایک دوسرے کے موقف کی بھرپور حمایت کی ہے۔

گرینڈ نیشنل اسمبلی ترکیہ کے سپیکر اور سپیکر آذربائیجان نے پرتپاک استقبال پر پنجاب کی پارلیمان اور عوام کا شکریہ ادا کیا۔سپیکر آذربائیجان نے کہا کہ آذربائیجان44 روزہ جنگ میں پاکستان کی غیر متزلزل حمایت پر ہمیشہ شکر گزار رہے گا، تینوں ممالک کے مابین تجارت اور تعاون مستقل طور پر فروغ پانا ضروری ہے۔ترک سپیکرنے کہا کہ تینوں ممالک کا پارلیمانی تعاون ہماری مشترکہ تاریخ، ثقافت اور اخلاقی اقدار کا فطری تسلسل ہے۔

انہوں نے کہا کہ پاکستان، ترکیہ اور آذربائیجان تین ریاستیں مگر ایک قوم ہیں اور دہشت گردی کے خلاف کسی سمجھوتے کی گنجائش نہیں، مشترکہ دفاعی اور عسکری تعاون وقت کی اہم ضرورت ہے۔اس موقع پر سپیکر پنجاب اسمبلی نے معزز مہمانوں کو یادگاری شیلڈز پیش کیں ۔دونوں ممالک کے سپیکرز نے سپیکر پنجاب اسمبلی ملک محمد احمد خان کے ہمراہ مزارِ اقبال پر حاضری دی اور عظیم تاریخی بادشاہی مسجد کا دورہ بھی کیا ۔

انہوں نے مزار اقبال پر پھول چڑھائے، فاتحہ خوانی کی اور شاعرِ مشرق علامہ محمد اقبال کی فکری خدمات کو زبردست خراجِ عقیدت پیش کیا۔اس موقع امتِ مسلمہ کے اتحاد، ترقی اور خوشحالی کے لئے دعا کی۔مہمانانِ گرامی نے مزارِ اقبال کی یادگاری کتاب میں اپنے تاثرات بھی قلم بند کیے اور پاکستانی عوام کے لئے نیک تمنائوں کا اظہار کیا۔