ٹرمپ کو سنبھالنا صرف شہباز شریف کو آتا ہے، برطانوی اخبار

ٹرمپ نے اسٹیج کی جانب واپس آنا چاہا تو شہباز شریف نے انہیں روک دیا ،رپورٹ

جمعرات 16 اکتوبر 2025 17:59

لندن(اُردو پوائنٹ اخبارتازہ ترین - این این آئی۔ 16 اکتوبر2025ء) برطانوی اخبار نے کہا ہے کہ امریکی صدر ڈونلڈ ٹرمپ کو سنبھالنا صرف پاکستانی وزیراعظم شہباز شریف کو آتا ہے۔اخبار نے لکھا کہ شرم الشیخ میں ٹرمپ نے کئی عالمی رہنمائوں کو زچ کیا، اطالوی وزیراعظم کے حسن کی تعریف کی، برطانوی وزیراعظم کو اشارہ دیا کہ جیسے وہ انہیں گفتگو کے لیے بلا رہے ہیں مگر پھر خود مائیک سنبھال کر انہیں شرمندہ کر دیا۔

اخبار نے لکھا کہ واحد رہنما جنہیں معلوم تھا کہ صدر ٹرمپ کوکیسے سنبھالنا ہے، وہ پاکستان کے وزیراعظم شہباز شریف تھے۔اخبارنے اپنی رپورٹ میں لکھا کہ شہباز شریف نے صدر ٹرمپ کی بہت زیادہ تعریف کی، ایک موقعے پر ٹرمپ نے اسٹیج کی جانب واپس آنا چاہا تو شہباز شریف نے انہیں روک دیا اور اپنی تقریر کا سلسلہ جاری رکھا۔

(جاری ہے)

رپورٹ کے مطابق ٹرمپ اس تقریب میں 2 گھنٹے سے زیادہ تاخیر سے پہنچے، پہلے انہوں نے متحدہ عرب امارات کے نائب صدر شیخ منصور بن زائد سے ملاقات پر ان کی جانب اشارہ کرتے ہوئے کہا کہ ان کے پاس بہت سا کیش ہے۔

پھر اطالوی وزیراعظم جورجیا میلونی کے حسن کی تعریف کی، ہنگری کے صدر وکٹر اور بان کے بارے میں کہا کہ انہیں بہت سے لوگ پسند نہیں کرتے مگر میں انہیں پسند کرتا ہوں اور اہمیت بھی صرف میری ہی ہے۔برطانوی وزیراعظم اسٹارمر کے بارے میں کہا کہ وہ کہاں ہیں، ہمیشہ کی طرح میرے پیچھے کھڑے ہیں۔ اسٹارمر سمجھے کہ انہیں بولنے کی دعوت دی جا رہی ہے مگر ٹرمپ نے ایک بار پھر مائیک پر گفتگو شروع کی تو اسٹارمر کو شرمندہ سا ہو کر واپس اپنی جگہ پر جانا پڑا۔

کینیڈا کے وزیراعظم کو شکایت تھی کہ ٹرمپ نے انہیں وزیراعظم کے بجائے صدر کیوں کہا، ٹرمپ نے ان سے کہا کہ شکر کرو میں نے تمہیں کینیڈاکا گورنر نہیں کہا۔رپورٹ کیء مطابق واحد رہنما جو ٹرمپ کو سنبھالنے میں کام یاب رہے وہ پاکستانی وزیراعظم شہباز شریف تھے۔