ریوائزڈ نیشنل ایکشن پلان کی کامیابی پاکستان کے پائیدار امن اور ترقی کی بنیاد ہے‘ مجتبیٰ شجاع الرحمن

منگل 21 اکتوبر 2025 16:20

لاہور (اُردو پوائنٹ اخبارتازہ ترین - این این آئی۔ 21 اکتوبر2025ء) وزیر خزانہ و صوبائی وزیر برائے پارلیمانی امور پنجاب میاں مجتبیٰ شجاع الرحمن کی زیر صدارت ’’ریوائزڈ نیشنل ایکشن پلان (R-NAP) 2021‘‘کے تحت صوبائی سطح پر تشکیل کردہ سوشیو پولیٹیکل اسٹیئرنگ/ریویو کمیٹی کا اجلاس سول سے سیکرٹریٹ لاہور میں منعقد ہوا۔اجلاس میں ایڈیشنل چیف سیکرٹری پنجاب، محکمہ داخلہ ، محکمہ قانون و پارلیمانی امور اور متعلقہ محکموں کے نمائندہ افسران نے شرکت کی۔

اجلاس میں ریوائزڈ نیشنل ایکشن پلان کے تحت صوبائی سطح پر لیے جانے والے اقدامات میں پیش رفت کا تفصیلی جائزہ لیا گیا۔ اجلاس میں مختلف محکموں سے انسدادِ انتہا پسندی، دہشت گردی، سماجی ہم آہنگی کے فروغ، نوجوانوں کی شمولیت اور ادارہ جاتی تعاون سے متعلق اقدامات پر بریفننگ لی گئی۔

(جاری ہے)

اس موقع پر اجلاس سے خطاب کرتے ہوئے وزیر خزانہ میاں مجتبیٰ شجاع الرحمن نے کہا کہ وزیر اعلیٰ پنجاب مریم نواز شریف کی قیادت میں صوبائی حکومت امن، برداشت اور ترقی کے ایجنڈے کو مضبوطی سے آگے بڑھا رہی ہے۔

ہماری اولین ترجیح ایک پرامن اور ہم آہنگ پنجاب ہے جہاں ہر شہری خود کو محفوظ محسوس کرے۔حکومت پنجاب ریوائزڈ نیشنل ایکشن پلان کے اہداف کے حصول کے لیے تمام محکموں کے مابین ہم آہنگی اور کوآرڈینیشن کو مزید مؤثر بنا رہی ہے جو صرف حکومتی پالیسی نہیں بلکہ قومی سلامتی اور سماجی استحکام کا مشترکہ عزم ہے۔میاں مجتبیٰ شجاع الرحمن نے متعلقہ محکموں کو ہدایت کی کہ وہ سماجی استحکام، نوجوانوں کی شمولیت ، امن و رواداری کے فروغ اور انتہا پسندی کے خاتمے کے لیے اپنی سرگرمیوں کو مزید مؤثر بنائیں۔

انہوں نے کہا کہ ریوائزڈ نیشنل ایکشن پلان کی کامیابی پاکستان کے پائیدار امن اور ترقی کی بنیاد ہے اور پنجاب حکومت اس قومی فریضے میں اپنا بھرپور کردار ادا کرے گی۔اجلاس کے اختتام پر وزیر خزانہ نے صوبے میں امن و امان اور انتہا پسندی پر کنٹرول کے لیے اقدامات پر اطمینان کا اظہار کرتے ہوئے کہا کہ متعلقہ محکموں کی مشترکہ کاوشیں ہی ایک محفوظ، پٴْرامن اور خوشحال پنجاب کی ضمانت ہیں۔