ٹی ایل پی کے فنانسرز پر دہشتگردی کے مقدمات درج ہوں گے ، 3800 معاونین کی نشاندہی کرلی‘عظمیٰ بخاری

لاہور (اُردو پوائنٹ اخبارتازہ ترین - این این آئی۔ 21 اکتوبر2025ء) وزیر اطلاعات پنجاب عظمیٰ بخاری نے کہا ہے کہ تحریک لبیک پاکستان کی مالی مدد کرنے والوں کے خلاف دہشت گردی کے مقدمات درج ہوں گے، 3800معاونین کی نشاندہی کرلی، خادم حسین رضوی کی قبر کہیں منتقل نہیں کی جارہی مگر قبر کا استعمال کرتے ہوئے چندہ اکٹھا کرنے اور اشتعال انگیزی کے لیے مجمع اکٹھا کرنے کی اجازت نہیں دی جائے گی،ٹی ایل پی کی 330مساجد کا انتظام حکومت نے سنبھال لیا ، یہ مساجد اذان اور نماز کے لیے کھلی رہیں گی، 223مدارس کی بھی جیو ٹیگنگ مکمل کرلی گئی ہے،سعد رضوی ، انکے بھائی کو ٹریس کیا جارہا ہے، آج نہیں تو کل قانون کی گرفت میں ہوں گے۔

انہوں نے لاہور پریس کانفرنس سے خطاب کرتے ہوئے کہا کہ ٹی ایل پی کے احتجاج کے دوران لاشوں کا پروپیگنڈا کیا گیا، مریدکے واقعے میں 3شہری شہید ہوئے جو راہ گیر تھے جبکہ 45افراد زخمی ہوئے جبکہ پرتشدد احتجاج کے دوران 110 پولیس اہلکار زخمی ہوئے۔

(جاری ہے)

احتجاج کے دوران ستھرا پنجاب کی گاڑیوں سمیت پولیس موبائلز اور ریسکیو گاڑیوں کو نذر آتش کیا گیا، اینٹوں سے بھری ٹرالیاں ان کیساتھ چل رہی تھیں۔

انہوں نے کہا کہ ٹی ایل پی کی مالی مدد کرنے والوں کے خلاف دہشت گردی کے مقدمات درج ہوں گے، 3800معاونین کی نشاندہی کرلی، حیرت ہوئی کہ ٹی ایل پی کی مالی مدد کرنے والوں میں بڑے بڑے نام اور پڑھے لکھے لوگ بھی شامل تھے۔انہوں نے بتایا کہ سعد رضوی کے گھر سے ایک کلو 920گرام سونا، 898گرام چاندی، 69برانڈڈ گھڑیاں، سونے کے کنگن، 12بریسلیٹ، سونے کے ہار، چاندی کے تاج، انگوٹھیاں اور 50ہزار بھارتی روپے برآمد ہوئے۔

سعد رضوی کے 91بینک اکائونٹس تھے جنہیں سربمہر کیا جاچکا ہے۔ عظمیٰ بخاری نے کہا کہ کوئی مسلمان کسی مسجد کو شہید کرنے کا سوچ بھی نہیں سکتا مگر ان مساجد کا انتظام اہل سنت کے معتدل علماء کے حوالے کیا جائے گا۔ انہوں نے واضح کیا کہ خادم حسین رضوی کی قبر کہیں منتقل نہیں کی جارہی مگر قبر کا استعمال کرتے ہوئے چندہ اکٹھا کرنے اور اشتعال انگیزی کے لیے مجمع اکٹھا کرنے کی اجازت نہیں دی جائے گی۔

انہوں نے کہاکہ ٹی ایل پی کی 330مساجد کا انتظام حکومت نے سنبھال لیا ہے، یہ مساجد اذان اور نماز کے لیے کھلی رہیں گی، لائوڈ اسپیکر ایکٹ کی خلاف ورزی پر زیرو ٹالرنس ہے، تمام مسالک سے درخواست ہے لائوڈ اسپیکر کو اذان اور مساجد کو صرف نماز کے لیے استعمال کیا جائے، باقی کسی سرگرمی کی اجازت نہیں ہوگی۔عظمیٰ بخاری نے بتایا کہ ٹی ایل پی کے 223مدارس کی جیو ٹیگنگ مکمل کرلی گئی ہے، یہ مدارس بہت جلد کھول دیئے جائیں گے، سوائے چند ایسے مدارس کہ جن کے بارے میں قانون نافذ کرنے والے اداروں کے پاس سخت رپورٹس موجود ہیں، ان مدارس کو جلد اہلسنت والجماعت کے علمائے کرام کے حوالے کردیا جائے گا۔

عظمیٰ بخاری نے سوشل میڈیا کی رپورٹ کے حوالے سے کہا کہ جو بچے پکڑے جاتے ہیں ان کے والدین دہائیاں دیتے ہیں، میری گزارش ہے کہ پریشانی سے بچنے کے لیے اپنے بچوں پر نظر رکھیں، آپ کے بچے کسی کا ایندھن بننے کے لیے دنیا میں نہیں آئے، آپ کے بچوں کو بھی تعلیم اور ترقی ملنی چاہیے۔انہوں نے سوشل میڈیا کا غلط استعمال کرنے والوں کو متنبہ کیا کہ ان کے خلاف دہشت گردی کے پرچے بنیں گے، ان کا پولیس ریکارڈ ہوگا، انہیں کہیں داخلہ ملے گا اور نہ کوئی ویزا مل سکے گا، اور نہ یہ ملک کے اندر کوئی سہولت حاصل کرپائیں گے، انہوں نے والدین سے اپیل کی کہ اپنے بچوں کو ان تکالیف سے بچائیں۔

انہوں نے کہا کہ یہ بات بھی ریکارڈ پر آئی ہے کہ ٹی ایل پی کے 6مدارس حکومتی پراپرٹی میں بنے ہوئے تھے۔انہوں نے کہاکہ ان مقدمات کی پیروی کے لیے اسپیشل پراسیکیوشن سیل تشکیل دیا جاچکا ہے، ان مقدمات سے انتہائی سختی کے ساتھ سائنسی طریقے سے نمٹا جائے گا۔عظمیٰ بخاری نے سعد رضوی اور ان کے بھائی کا نام لیے بغیر کہا کہ کہا گیا کہ دونوں بھائیوں کو ماردیا گیا ہے، انہیں گولیاں لگی ہیں اور وہ زخمی ہیں لیکن ایسا قطعی کچھ نہیں ہے، دونوں بھائی کو ٹریس کیا جارہا ہے، آج نہیں تو کل وہ قانون کی گرفت میں ہوں گے۔

وزیر اطلاعات نے مزید کہا کہ وفاقی حکومت کو پنجاب کابینہ کا ٹی ایل پی پر پابندی کی تجویز بھجوائی جاچکی ہے جس پر ایک دو دن میں فیصلہ آجائے گا، جو بھی فیصلہ ہوگا اس پر اصل روح کے ساتھ عملدرآمد کیا جائے گا۔انہوں نے بتایا کہ کریک ڈائون کے سلسلے میں ٹی ایل پی کو 3درجوں میں تقسیم کیا گیا ہے، پہلے اور دوسرے درجے میں ان کی قیادت شامل ہے جبکہ تیسرے درجے سوشل میڈیا اور واٹس ایپ پر اشتعال انگیزی کے ذریعے لوگوں کو باہر آنے کے لیے اکساتے ہیں، ان تمام کے خلاف کریک ڈائون ہورہا ہے اور ریاست اور حکومت ان کے ساتھ سختی سے نمٹ رہا ہے۔