پنجاب میں لوکل گورنمنٹ ایکٹ 2025ء کے تحت بلدیاتی انتخابات کرانے کا فیصلہ

الیکشن کمیشن نے حلقہ بندیوں سےمتعلق نوٹی فکیشن واپس لے لیا، صوبائی حکومت کو رولز مکمل کرنے کیلئے 4 ہفتے کی مہلت دیدی

ساجد علی منگل 21 اکتوبر 2025 16:01

اسلام آباد (اُردو پوائنٹ اخبارتازہ ترین۔ 21 اکتوبر2025ء) صوبہ پنجاب میں لوکل گورنمنٹ ایکٹ 2025ء کے تحت بلدیاتی انتخابات کرانے کا فیصلہ کرلیا گیا۔ تفصیلات کے مطابق الیکشن کمیشن آف پاکستان کا اہم اجلاس چیف الیکشن کمشنر سکندر سلطان راجہ کی صدارت میں منعقد ہوا، جس میں پنجاب میں بلدیاتی انتخابات کے انعقاد سے متعلق امور پر غور کیا گیا، اجلاس میں ممبرانِ الیکشن کمیشن، سیکریٹری الیکشن کمیشن، سپیشل سیکریٹری، سپیشل سیکریٹری لاء اور دیگر سینئر افسران شریک ہوئے۔

معلوم ہوا ہے کہ اجلاس میں سیکریٹری الیکشن کمیشن نے اراکین کو بریفنگ دی جس میں انہوں نے آگاہ کیا کہ پنجاب اسمبلی نے لوکل گورنمنٹ ایکٹ 2025ء منظور کرلیا ہے، جس کی منظوری گورنر پنجاب نے دے دی ہے، نئے ایکٹ کے نفاذ کے بعد لوکل گورنمنٹ ایکٹ 2022ء منسوخ ہوچکا ہے لہٰذا پرانی حلقہ بندی کمیٹیوں اور شیڈول سے متعلق نوٹیفکیشن واپس لینے کی سفارش کی گئی۔

(جاری ہے)

اجلاس میں بتایا گیا کہ صوبائی حکومت نے کمیشن سے 3 سے 4 ہفتوں کی مہلت مانگی ہے تاکہ نئی حلقہ بندی اور ڈیمارکیشن رولز مکمل کیے جا سکیں، نئے ایکٹ کے بعد پرانے قانون کے تحت اقدامات الیکشن ایکٹ 2017ء کی سیکشن 219 کی خلاف ورزی ہوں گے۔ بتایا جارہا ہے کہ الیکشن کمیشن نے بریفنگ کی روشنی میں آئین و قانون کے تحت فیصلے کیے کہ پنجاب میں بلدیاتی انتخابات لوکل گورنمنٹ ایکٹ 2025ء کے تحت ہی کروائے جائیں گے، ایکٹ 2022ء کے تحت جاری حلقہ بندی کا شیڈول واپس لیا جائے گا، پنجاب حکومت کو 4 ہفتے میں حلقہ بندی اور ڈیمارکیشن رولز مکمل کرنے کی ہدایت دی گئی تاہم اگر صوبائی حکومت مقررہ مدت میں کام مکمل نہ کر سکی تو معاملہ ریگولر سماعت کے لیے مقرر کرکے مزید کارروائی کی جائے گی۔