پاکستان سے کاروبار سمیٹنے ،سرمایہ بیرون ممالک منتقل کرنے کے رجحان میں اضافہ ہو رہا ہے.خادم حسین

سرمایہ کاروں کو راغب کرنے کیلئے دبئی طرز پر سہولیات ، مراعات دینا ہوں گی.رکن بورڈ آف ڈائریکٹرز سٹون ڈویلپمنٹ کمپنی

میاں محمد ندیم منگل 18 نومبر 2025 13:27

پاکستان سے کاروبار سمیٹنے ،سرمایہ بیرون ممالک منتقل کرنے کے رجحان ..

لاہور(اردوپوائنٹ اخبارتازہ ترین-انٹرنیشنل پریس ایجنسی۔18 نومبر ۔2025 ) فاﺅنڈر ز گروپ کے سرگرم رکن ،پاکستان سٹون ڈویلپمنٹ کمپنی کے بورڈ آف ڈائریکٹر کے رکن سینئر نائب صدر فیروز پور روڈ بورڈاورسابق ممبر لاہور چیمبر آف کامرس خادم حسین نے کہا ہے کہ رپورٹ کے مطابق حالیہ سالوں میں غیر ملکی سرمایہ کاری ہی نہیں بلکہ مقامی سرمایہ کاری بھی سست روی کا شکار ہے جس سے مقامی کاروباروں کوسرمائے کی قلت کا سامناہے .

(جاری ہے)

انہوں نے کہاکہ پاکستان سے کاروبار سمیٹنے اور سرمایہ بیرون ممالک منتقل کرنے کے رجحان بھی اضافہ دیکھا جارہاہے جو تشویش کا باعث ہے اپنے بیان میں خادم حسین نے کہا کہ بہت سے ممالک مینو فیکچررز کو غیر معمولی سہولیات اور مراعات کی پیشکش کررہے ہیںجس کی وجہ سے یہاں سے کاروبار سمیٹنے کے رجحان میں اضافہ دیکھا جارہا ہے اور بہت سے لوگ مستقبل کے لئے منصوبہ بندی کر رہے ہیں.

انہوں نے کہاکہ پاکستان میں بلند ٹیکس اور توانائی کی قیمتیں بھی صورتحال کو مزید خراب کر رہی ہیںکیونکہ پیداواری لاگت بڑھنے سے خالص منافع کم ہو رہا ہے جبکہ دیگر گھمبیر مسائل اس کے علاوہ ہیں یہ بھی رجحان ہے کہ نیا کاروبار لگانے کی بجائے مقامی ادارے بیرون ملک واپس جانے والی کمپنیوں کے کاروبار خرید رہے ہیں جس سے مقامی سرمایہ کاری نہیں ہو رہی بلکہ یہ رقم بیرون ملک جارہی ہے.

انہوںنے کہا کہ پاکستان دبئی کے تقریباً صفر فیصد انکم ٹیکس، ہموار ویزا نظام اور کاروبار دوست ماحول کے ساتھ مقابلہ نہیں کر سکتا، جہاں قیام کے اخراجات بہتر بنیادی ڈھانچے اور قانون کی حکمرانی کے ذریعے پورے ہوتے ہیں اور خطرے کے مطابق ایڈجسٹ کرنے کے بعد منافع اکثر دو سے تین گنا زیادہ ہوتا ہے سرمایہ کاروں کو راغب کرنے کیلئے پاکستان کوبھی اسی طرز پر سہولیات اور مراعات دینا ہوں گی.