جنرل باجوہ نے ایکسٹینشن کے لئے دھمکیاں دیں میں ٹیک اوورکرلوں گا، خواجہ آصف کا انکشاف

سابق آرمی چیف کبھی لالچ اور کبھی دھمکی دیتے رہے، آپ تصورنہیں کرسکتے، آٹھ نو دن ہم ان کے پاس جاتے رہے، وزیر دفاع کی گفتگو

فیضان ہاشمی جمعہ 12 دسمبر 2025 15:52

جنرل باجوہ نے ایکسٹینشن کے لئے دھمکیاں دیں میں ٹیک اوورکرلوں گا، خواجہ ..

اسلام آباد (اُردو پوائنٹ اخبارتازہ ترین۔ 12 دسمبر2025ء) وزیر دفاع خواجہ آصف نے انکشاف کیا ہے کہ جنرل باجوہ نے ایکسٹینشن کے لئے دھمکیاں دیں میں ٹیک اوورکرلوں گا۔ فیض حمید جنرل باجوہ کے بغیر کچھ نہیں کرسکتے تھے۔ میڈیا رپورٹس کے مطابق وزیردفاع خواجہ آصف نے انکشاف کیا کہ 2022 ء میں فوج کے نئے سربراہ کی تعیناتی کے عمل کے دوران جنرل باجوہ نے آٹھ ، نو دن مزاحمت کی ، دھمکیاں دیں کہ میں ٹیک اوور کرلوں گا، مجھے ایکسٹینشن دے دیں۔

وفاقی وزیر نے بتایا کہ جنرل قمر جاوید باجوہ کبھی لالچ اور کبھی دھمکی دیتے رہے، آپ تصورنہیں کرسکتے، آٹھ نو دن ہم ان کے پاس جاتے رہے۔ ان کا مزید کہنا تھا کہ ماضی میں فوج نے کسی سویلین حکومت کی اتھارٹی کو اس طرح چیلنج نہیں کیا، جنرل کیانی، پرویزمشرف اور راحیل شریف کے تقرر میں سول اتھارٹی کو مانا گیا۔

(جاری ہے)

وزیر دفاع نے مزید کہا کہ باجوہ نے پہلے کوشش کی فیض حمید ہی فوج کے سربراہ بن جائیں۔

خواجہ آصف کا مزید کہنا تھا کہ فیض حمید کو 15مہینے کے پراسیس کے بعد 14سال کی سزا سنائی گئی، انہیں آرمی کے کورٹ آف اپیلز میں جانے کا حق ہے۔ فیض حمید کو کورٹ آف اپیلز کے بعد آرمی چیف کے پاس بھی اپیل کا حق حاصل ہے، وہ فوج کے جوڈیشل پراسیس کے بعد ہائیکورٹ بھی جا سکتے ہیں، انہیں انصاف کا سارا پراسیس اور ادارے میسر ہیں۔ انہو ں نے کہاکہ نواز شریف کا پانامہ پیپرز میں نام نہیں تھا، سیدھا سپریم کورٹ میں کیس شروع کیا گیا، انور ظہیر جمالی کے بعد ثاقب نثار نے کھوسہ صاحب کو انصاف کی مسند پر بٹھایا۔خواجہ آصف نے کہا کہ انہوں نے قانون کی بجائے انگریزی ناولوں کے حوالے دینے شروع کردیئے، فیصلے نے نواز شریف کو نااہل قرار دیا اور وزارت عظمی سے ہٹایا گیا۔