Live Updates

منافقت اور موقع پرستی شاہد خاقان عباسی اور مفتاح اسماعیل پر ختم ہے، گنہور خان اسران

بدھ 29 اپریل 2026 17:53

کراچی(اُردو پوائنٹ اخبارتازہ ترین - این این آئی۔ 29 اپریل2026ء) ترجمان سندھ حکومت گنہور خان اسران نے سابق وزیراعظم شاہد خاقان عباسی کی پریس کانفرنس پر سخت ردعمل دیتے ہوئے کہا ہے کہ سیاسی منافقت اور موقع پرستی شاہد خاقان عباسی اور مفتاح اسماعیل پر ختم ہے۔ انہوں نے کہا کہ کراچی کے مسائل پر شاہد خاقان عباسی دکھاوے کے آنسو نہ بہائیں۔اپنے بیان میں گنہور خان اسران نے کہا کہ جب شاہد خاقان عباسی وزیراعظم تھے تو کراچی کو اس کا جائز حصہ دینے کے بجائے ایک صوبے کے منصوبوں پر وفاقی ترقیاتی بجٹ کا بڑا حصہ خرچ کیا جاتا رہا۔

انہوں نے کہا کہ کراچی کے ساتھ شاہد خاقان عباسی نے بطور وزیراعظم جو سلوک کیا، وہ کسی سے پوشیدہ نہیں۔ترجمان سندھ حکومت نے کہا کہ یہ افسوسناک امر ہے کہ ایک سابق وزیراعظم آج ایسے لہجے میں تنقید کر رہے ہیں جیسے وہ خود اس نظام کا کبھی حصہ ہی نہ رہے ہوں۔

(جاری ہے)

انہوں نے کہا کہ تمام سیاسی جماعتیں کراچی کو صرف ووٹ لینے، تقریریں کرنے اور سیاسی پوائنٹ اسکورنگ کے لیے استعمال کرتی رہی ہیں۔

گنہور خان اسران نے کہا کہ آج اگر پاکستان پیپلز پارٹی کراچی میں میگا پروجیکٹس پر عملی کام کر رہی ہے تو بعض عناصر روڑے اٹکانے آگئے ہیں۔ انہوں نے کہا کہ شاہد خاقان عباسی اگر واقعی کراچی کے مسائل کے حل میں مخلص ہیں تو پہلے یہ بتائیں کہ اپنے دورِ حکومت میں کراچی کے لیے کون سا انقلابی قدم اٹھایا۔انہوں نے سوال اٹھایا کہ شاہد خاقان عباسی بتائیں کہ کتنے ترقیاتی منصوبے مکمل کیے گئے اور کتنے مسائل حل کیے گئے۔

ترجمان سندھ حکومت نے کہا کہ صرف فنڈز جاری کرنے کے دعوے کافی نہیں ہوتے، عوام نتائج مانگتی ہے، فائلوں کے نمبر نہیں۔انہوں نے مزید کہا کہ سندھ حکومت کراچی کی ترقی، انفراسٹرکچر کی بہتری اور شہری سہولیات کی فراہمی کے لیے سنجیدہ اقدامات کر رہی ہے، جبکہ اپوزیشن جماعتیں صرف بیان بازی تک محدود ہیں۔