صدر ٹرمپ ذہنی اور جسمانی طور پر موثر طریقے سے خدمات انجام دینے کے اہل نہیں، 59فیصد امر یکیوں کی رائے

واشنگٹن(اردوپوائنٹ اخبارتازہ ترین-انٹرنیشنل پریس ایجنسی۔05 مئی ۔2026 ) امریکی عوام کی اکثریت نے خیال ظاہر کیا ہے کہ صدرڈونلڈ ٹرمپ ذہنی اور جسمانی طور پر موثر طریقے سے بطور کمانڈر ان چیف خدمات انجام دینے کے اہل نہیں امریکی اخبار واشنگٹن پوسٹ ، چینل اے بی سی نیوز اور اپسوس پول میں 59 فیصد امریکیوں کی رائے ہے کہ صدر ٹرمپ کی ذہنی صلاحیت ایسی نہیں جو ملک کی قیادت کے لیے درکار ہے.

پول کے مطابق55 فیصد بالغ امریکیوں کا کہنا تھا کہ صدر ٹرمپ کی جسمانی ودماغی صحت عہدے کی مناسبت سے اچھی نہیں تاہم 40 فیصد نے کہا کہ ٹرمپ ملکی قیادت کے لیے مکمل اہل ہیں جبکہ 1 فیصد امریکیوں نے سوال کا کوئی جواب نہیں دیا.

(جاری ہے)

پول میں44 فیصد نے اس سے اتفاق نہیں کیا اور 1فیصد نے کوئی جواب نہیں دیا سروے کے 67 فیصد شرکا نے کہا کہ انہیں نہیں لگتا کہ ٹرمپ اہم فیصلے کرسکتے ہیں دوسری جانب واشنگٹن میں تقریب سے خطاب کے دوران امریکی صدر ڈونلڈ ٹرمپ نے اپنی صحت سے متعلق گفتگو کرتے ہوئے کہا کہ وہ آج بھی خود کو ایسا ہی محسوس کرتے ہیں جیسا 50 سال پہلے محسوس کرتے تھے.

امریکی صدر نے کہا کہ آدمی کی صحت خراب ہو تو پتا چل جاتا ہے جیسے پچھلی امریکی انتظامیہ میں پتا چل جاتا تھا ٹرمپ نے کہا کہ وہ آج بھی خود کو ایسا ہی محسوس کرتے ہیں جیسا 50 سال پہلے محسوس کرتے تھے امریکی صد نے کہا کہ وہ اگلے 8 سے 9 سال برسراقتدار رہیں گے چھوٹے کاروباری افراد سے خطاب میں کاروباری افراد کے لیے ٹیکس میں چھوٹ کا اعلان کرتے ہوئے ٹرمپ نے از راہ مزاق کہا کہ جب وہ8 یا 9 سال بعد اقتدار چھوڑیں گے تو وہ خود بھی اس ٹیکس رعایت سے فائدہ اٹھا سکیں گے.

امریکی صدر نے دورہ چین کو اہم قرار دیتے ہوئے کہا کہ وہ چین کے صدر سے ملاقات کے منتظر ہیں دوسری جانب ڈونلڈ ٹرمپ ایران جنگ سے متعلق صحافیوں کے سوالوں کے جواب دیے بغیر تقریب سے روانہ ہو گئے‘ واضح رہے کہ صدرٹرمپ کی صحت پرامریکی ذرائع ابلاغ میں تبصرے معمول کا حصہ ہیں اور کئی طبی ماہرین کا دعوی ہے کہ ٹرمپ ذہنی زوال کا شکار ہیں جو ان کی عمر میں معمول کی بیماری خیال کی جاتی ہے.

امریکی ذرائع ابلاغ کا یہ بھی کہنا ہے کہ وائٹ ہاﺅس صدرکی صحت کے بارے میں ہرسال مستندمیڈیکل رپورٹ کانگریس کے سامنے پیش کرنے کا پابند ہے تاہم ابھی تک کانگریس کو صدرکی مستند میڈیکل رپورٹ پیش نہیں کی گئی اسی طرح ویک اینڈ پر ریاست فلوریڈا میں ٹرمپ کے معمول سے ہٹ کر ایک مقامی کلینک میں چیک اپ کروانے کو بھی بعض صحافی شہریوں سے حقائق چھپانے کی کوشش قراردے رہے ہیں کیونکہ فلوریڈا کے مقامی کلینک کا دورہ صدرکے شیڈول میں شامل نہیں تھا جبکہ رولزکے مطابق صدرکسی مقامی نجی کلینک میں معائنہ نہیں کرواسکتے .

امریکی صدر کا معائینہ صرف امریکی فوج کے مخصوص ہسپتال اور وائٹ ہاﺅس کے مقررکردہ ڈاکٹرہی کرسکتے ہیں‘صدر اپنے ذاتی معالج کو وائٹ ہاﺅس کی میڈیکل ٹیم میں شامل کرسکتے ہیں تاہم مقامی نجی کلینک میں معائنے کو معنی خیزقراردیا جارہا ہے ‘اسی طرح صدرکے لیے مخصوص ہیلی کاپٹر”میرین ون“کی حالیہ مہینوں میں ریاست میری لینڈ کے فوجی ہسپتال میں بے وقت کی پروازوں کی خبروں پر بھی امریکی ذرائع ابلاغ سوال اٹھاتے آرہے ہیں.