متحدہ قومی موومنٹ پاکستان کے زیر اہتمام “معرکۂ حق” کے سلسلہ میں نمائندہ اجلاس

منگل 5 مئی 2026 22:22

اسلام آباد (اُردو پوائنٹ اخبارتازہ ترین - اے پی پی۔ 05 مئی2026ء) ایم کیو ایم کے چیئرمین ڈاکٹر خالد مقبول صدیقی کی قیادت میں متحدہ قومی موومنٹ پاکستان کے زیر اہتمام “معرکۂ حق” میں پاکستان کی فتح کی سالگرہ کے موقع پر صوبائی تنظیمی کمیٹیوں کا نمائندہ اجلاس منعقد ہوا۔تقریب سے خطاب کرتے ہوئے خالد مقبول صدیقی نے کہا کہ اس ہال میں موجود افراد پورے پاکستان کی نمائندگی کر رہے ہیں اور یہی لوگ ملک کا مستقبل ہیں، انہوں نے کہا کہ گزشتہ سال اس دن سے پاکستان کے ایک نئے سفر کا آغاز ہوا اور ملک کو ملتِ اسلامیہ کے لیے سر اٹھا کر چلنے کے مقصد سے بنایا گیا تھا۔

کنوینئر خالد مقبول صدیقی نے کہا کہ پاکستان اس وقت تک ترقی نہیں کر سکتا جب تک کسانوں، مزدوروں اور سرمایہ داروں کی نمائندگی انہی طبقات کے افراد نہ کریں، موجودہ صورتحال میں کسانوں اور مزدوروں کے حقوق سلب ہو رہے ہیں جبکہ عام آدمی کے بجائے مخصوص خاندان حکمرانی کر رہے ہیں۔

(جاری ہے)

انہوں نے زور دیا کہ ایوانوں کو ووٹ لینے والوں کے بجائے ووٹ دینے والوں کی نمائندگی کرنی چاہیے اور قانون سازی بھی عوام کے مفاد میں ہونی چاہیے۔

خالد مقبول صدیقی نے کہا کہ ایم کیو ایم نے اپنی تحریک کو عبادت سمجھ کر شروع کیا اور ہمیشہ عام لوگوں کو آگے لانے کی کوشش کی۔ انہوں نے کہا کہ جماعت نے کبھی جاگیرداروں اور سرمایہ داروں کو ترجیح نہیں دی بلکہ ایسے نمائندے منتخب کیے جو عوام کے مسائل کو سمجھتے ہوں، ان کا کہنا تھا کہ ایم کیو ایم ایک عوامی جماعت ہے جو الیکٹیبلز کے سہارے نہیں بلکہ نظریے پر کھڑی ہے۔انہوں نے کہا کہ پارٹی کارکنان ملک کے مختلف حصوں میں متحرک اور تربیت یافتہ ہیں اور اب شراکتی جمہوریت کے فروغ کیلئے عوام کے درمیان جا کر فکری انقلاب لانا ہوگا۔