پاکستان ہماری پہچان ،پاک فوج بقا کی ضامن ہے،ڈسٹرکٹ وائس چیئرمین میر اسفندیار خان یارمحمد زئی

بدھ 6 مئی 2026 19:36

چاغی (اُردو پوائنٹ اخبارتازہ ترین - این این آئی۔ 06 مئی2026ء) یومِ معرکہ حق کے موقع پر ضلع چاغی کے ہیڈکوارٹر دالبندین میں پاکستان اور پاک فوج سے اظہارِ یکجہتی کے لیے ایک عظیم الشان ریلی نکالی گئی۔ ریلی کا انعقاد سابق چیئرمین سینیٹ و رکن صوبائی اسمبلی محمد صادق سنجرانی اور بلوچستان عوامی پارٹی کے سینئر صوبائی نائب صدر و سابق مشیر وزیراعلیٰ بلوچستان میر اعجاز خان سنجرانی کی خصوصی ہدایت پر کیا گیا، جبکہ قیادت ڈسٹرکٹ وائس چیئرمین میر اسفندیار خان یارمحمد زئی نے کی۔

ریلی میں خان پینل (بی اے پی) کے عہدیداران، قبائلی عمائدین، علاقائی رہنماؤں، ہندو برادری، تاجر برادری، تیل کمیٹی کے اراکین اور شہریوں کی بڑی تعداد نے شرکت کی۔ شرکاء نے قومی پرچم اور پاک فوج کے حق میں بینرز اٹھا رکھے تھے، جبکہ فضا پاکستان زندہ باد، پاک فوج زندہ باد اور بلوچستان پائندہ باد کے نعروں سے گونجتی رہی۔

(جاری ہے)

ریلی سے خطاب کرتے ہوئے میر اسفندیار خان یارمحمد زئی نے کہا کہ آج ہم یومِ معرکہ حق جوش و جذبے سے منا رہے ہیں کیونکہ پاکستان ہماری پہچان اور پاک فوج ہماری بقا کی ضامن ہے۔

انہوں نے کہا کہ یہ اجتماع اس بات کا واضح ثبوت ہے کہ چاغی کا بچہ بچہ وطن کے دفاع کے لیے ہمہ وقت تیار ہے۔ ان کا کہنا تھا کہ بلوچستان کے عوام اور افواجِ پاکستان ایک پیج پر ہیں اور کسی کو بھی امن و امان خراب کرنے کی اجازت نہیں دی جائے گی۔