Live Updates

امریکہ اور ایران کے درمیان مذاکرات اگلے ہفتے اسلام آباد میں دوبارہ شروع ہوں گے، امریکی اخبار

فریقین ایک 14 نکاتی مفاہمتی یادداشت تیار کر رہے ہیں، جس کے تحت مذاکرات کیلئے ابتدائی طور پر ایک ماہ کی مدت طے کی جائے گی، جس میں جنگ کے مستقل خاتمے کی راہ ہموار کی جائے گی؛ وال اسٹریٹ جرنل کا دعویٰ

ساجد علی ہفتہ 9 مئی 2026 10:47

اسلام آباد / واشنگٹن (اُردو پوائنٹ اخبارتازہ ترین۔ 09 مئی2026ء) امریکہ اور ایران کے درمیان مذاکرات اگلے ہفتے اسلام آباد میں دوبارہ شروع ہونے کا امکان ظاہر کیا جارہا ہے۔ امریکی اخبار 'وال اسٹریٹ جرنل' کے مطابق امریکہ اور ایران کے درمیان تعطل کا شکار مذاکرات آئندہ ہفتے اسلام آباد میں دوبارہ شروع ہو سکتے ہیں، اس بار دونوں فریقین ایک جامع معاہدے کے ذریعے جنگ کے بادل چھٹانے کی کوشش کریں گے، فریقین ایک 14 نکاتی مفاہمتی یادداشت تیار کر رہے ہیں، جس کے تحت مذاکرات کے لیے ابتدائی طور پر ایک ماہ کی مدت طے کی جائے گی، جس میں جنگ کے مستقل خاتمے کی راہ ہموار کی جائے گی۔

بتایا گیا ہے کہ ایران کے ایٹمی پروگرام اور یورینیم کی افزودگی پر قابو پانے سے متعلق امور زیرِ بحث آئیں گے، عالمی تجارتی گزرگاہ 'آبنائے ہرمز' میں کشیدگی کو کم کرنا ایجنڈے کا اہم حصہ ہے، ایران کے انتہائی افزودہ یورینیم کے ذخائر کو کسی تیسرے ملک منتقل کرنے کی تجویز پر بھی غور ہوگا، اگرچہ بات چیت کی میز سجنے کو تیار ہے، لیکن کچھ بنیادی مسائل اب بھی حل طلب ہیں۔

(جاری ہے)

معلوم ہوا ہے کہ ایران پر عائد معاشی پابندیوں میں کس حد تک نرمی کی جائے گی، یہ اب بھی بحث کا مرکزی نکتہ ہے اور مذاکرات کی کامیابی میں بڑی رکاوٹ بن سکتا ہے، اگر مذاکرات میں مثبت پیش رفت ہوتی ہے، تو باہمی رضامندی سے ایک ماہ کی مدت میں مزید اضافہ کیا جا سکتا ہے۔ یاد رہے کہ اس سے قبل 11 اپریل کو اسلام آباد میں مذاکرات کا پہلا دور ہوا تھا، وہ مذاکرات مسلسل 21 گھنٹے تک جاری رہے تھے، تاہم کسی حتمی نتیجے پر پہنچے بغیر ہی ختم ہو گئے تھے، مذاکرات کے اس نئے دور کو خطے میں پائیدار امن کے لیے انتہائی اہم قرار دیا جارہا ہے، اور سب کی نظریں اب اگلے ہفتے اسلام آباد میں ہونے والی اس بیٹھک پر جمی ہوئی ہیں۔