چین کے اعلی سطحی کاروباری وفد کا ایف پی سی سی آئی ریجنل آفس لاہور کا دورہ

لاہور (اُردو پوائنٹ اخبارتازہ ترین - اے پی پی۔ 09 مئی2026ء) چین کے 30 رکنی اعلی سطحی کاروباری وفد نے فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) ریجنل آفس لاہور کا دورہ کیا اور پاکستانی بزنس کمیونٹی کے ساتھ دوطرفہ تجارت، سرمایہ کاری و صنعتی تعاون کے فروغ کے حوالے سے تفصیلی ملاقاتیں کیں۔ملاقات کے بعد چینی کمپنیوں اور پنجاب بھر کے مختلف چیمبرز آف کامرس اینڈ انڈسٹری کے درمیان باہمی تعاون اور کاروباری تعلقات کے فروغ کے لیے مفاہمتی یادداشتوں (MoUs) پر دستخط کیے گئے۔

اس موقع پر پاکستانی تاجروں اور چینی وفد کے درمیان شعبہ وار بزنس ٹو بزنس (B2B) ملاقاتیں بھی منعقد ہوئیں تاکہ سرمایہ کاری کے مواقع اور ممکنہ مشترکہ منصوبوں کا جائزہ لیا جا سکے۔

(جاری ہے)

ایف پی سی سی آئی کے صدر عاطف اکرام شیخ نے کہا کہ پاک چین کے درمیان سی پیک اور اقتصادی تعاون کو مزید مضبوط بنانے کی کوششیں جاری ہیں، گوادر پورٹ دنیا کے لیے ایک اہم گیٹ وے کی حیثیت رکھتا ہے جبکہ پاکستان چین کو مشرق وسطی، افریقہ اور یورپ سے ملانے والا ایک اسٹریٹجک پل ہے۔

انہوں نے زور دیا کہ پاکستان کا جغرافیائی محل وقوع چینی صنعتوں کے لیے توسیع اور منتقلی کے مواقع کے حوالے سے غیر معمولی اہمیت کا حامل ہے۔ایف پی سی سی آئی کے ریجنل چیئرمین و نائب صدر ذکی اعجاز اور یونائیٹڈ بزنس گروپ (یو بی جی) کے سرپرست اعلی ایس ایم تنویر نے کہا کہ پاکستان کو جی ایس پی پلس اسٹیٹس کے تحت یورپی یونین کو 6,600 سے زائد ٹیرف لائنز پر ڈیوٹی فری برآمدات کی سہولت حاصل ہے جبکہ امریکہ تک بھی سازگار رسائی میسر ہے۔

انہوں نے کہا کہ اگرچہ چین سے براہ راست برآمدات کو بعض تجارتی رکاوٹوں کا سامنا ہو سکتا ہے، تاہم میڈ اِن پاکستانمصنوعات موجودہ تجارتی معاہدوں اور چین پاکستان فری ٹریڈ ایگریمنٹ (CPFTA) کے تحت مغربی منڈیوں تک کم ٹیرف کے ساتھ رسائی حاصل کر سکتی ہیں۔زرعی شعبے کے حوالے سے ذکی اعجاز نے کہا کہ پاکستان کی وسیع زرخیز زمینیں اور پنجاب کا ملک کے فروٹ باسکٹ کی حیثیت رکھنا کارپوریٹ فارمنگ اور ویلیو ایڈڈ فوڈ پراسیسنگ میں سرمایہ کاری کے بے شمار مواقع فراہم کرتا ہے تاکہ اعلی معیار کی مصنوعات چین برآمد کی جا سکیں۔

انہوں نے کہا کہ اسپیشل اکنامک زونز (SEZs) میں سرمایہ کاری کرنے والوں کو 10 سالہ ٹیکس چھوٹ کی سہولت بھی حاصل ہے۔ انہوں نے کہا کہ پاکستان کے اسپیشل اکنامک زونز چینی صنعتوں کے لییپلگ اینڈ پلیطرز کی بہترین سہولیات فراہم کرتے ہیں۔چین میں پاکستان کے سفیر خلیل ہاشمی نے چینی وفد کو پنجاب کے صنعتی کلسٹرز میں موجود مواقع اور صلاحیتوں کے بارے میں بریفنگ دی۔انہوں نے کہا کہ یہ دورہ مشترکہ منصوبوں، سرمایہ کاری اور تجارتی فروغ کے حوالے سے دوطرفہ تعاون کے ایک نئے باب کا آغاز ہے۔