بنوں میں پولیس چوکی پر دہشتگردوں کا حملہ، خودکش دھماکے میں 15 اہلکار شہید

دہشتگردوں نے پولیس چوکی فتح خیل پر بارود سے بھری گاڑی ٹکرا دی، تین اہلکاروں کو ملبے سے زندہ نکال لیا گیا

ساجد علی اتوار 10 مئی 2026 11:04

بنوں میں پولیس چوکی پر دہشتگردوں کا حملہ، خودکش دھماکے میں 15 اہلکار ..

بنوں (اُردو پوائنٹ اخبارتازہ ترین۔ 10 مئی2026ء) صوبہ خیبرپختونخواہ کے علاقہ بنوں میں پولیس چوکی پر دہشتگردوں نے حملہ کیا جہاں خودکش دھماکے میں 15 اہلکار شہید ہوگئے۔ میڈیا رپورٹس کے مطابق بنوں میں دہشت گردوں نے پولیس چوکی فتح خیل پر بارود سے بھری گاڑی ٹکرا دی، جس کے نتیجے میں اب تک شہید اہلکاروں کی تعداد 15 ہوچکی ہے، تین اہلکاروں کو ملبے سے زندہ نکال لیا گیا، شہداء میں رحمت ایاز، ثناء اللہ، نیاز علی، صحیب، سعداللہ، کامران ولد محمود خان، نعمت اللہ، کامران، عابد جانی، عمران، نعیم اللہ، صدیق اللہ، میر عالم خان، راحت اللہ خان اور فاروق داد شامل ہیں، سرچ اینڈ ریسکیو آپریشن تاحال جاری ہے۔

بتایا گیا ہے کہ ڈی آئی جی بنوں ریجن سجاد خان نے ڈی ایچ کیو ہسپتال کا دورہ کرتے ہوئے زخمی اہلکاروں کی عیادت کی، اس موقع پر میڈیا سے گفتگو میں انہوں نے کہا کہ بنوں پولیس کے حوصلے بلند ہیں، دہشت گرد اپنے ناپاک عزائم میں کبھی کامیاب نہیں ہوں گے، یہ دہشت گردوں کی آخری بزدلانہ کارروائی ثابت ہوگی، بنوں پولیس دہشت گردوں کو چن چن کر انجام تک پہنچائے گی اور علاقے سے ان کا مکمل خاتمہ یقینی بنایا جائے گا۔

(جاری ہے)

بتایا جارہا ہے کہ وزیراعلیٰ خیبر پختونخوا محمد سہیل آفریدی نے ضلع بنوں میں فتح خیل پولیس اسٹیشن پر دہشت گرد حملے کی شدید مذمت کرتے ہوئے جانی نقصان پر گہرے دکھ اور افسوس کا اظہار کیا، سہیل آفریدی نے زخمیوں کو بہترین طبی سہولیات کی فراہمی یقینی بنانے کی ہدایت کرتے ہوئے شہداء کے درجات کی بلندی اور زخمیوں کی جلد صحتیابی کے لیے دعا کی۔

نہوں نے کہا کہ دہشت گردی کے خلاف جنگ صرف خیبر پختونخواہ کی نہیں بلکہ پورے ملک کی جنگ ہے، بند کمروں میں کیے گئے فیصلوں اور مسلط کردہ پالیسیوں نے ملک کو بدامنی کی دلدل میں دھکیلا، دہشت گردی سے متاثرہ ہر خاندان کے ساتھ خیبر پختونخواہ حکومت کھڑی ہے، خیبر پختونخواہ پولیس نے دہشت گردی کے خلاف صف اول میں رہ کر عظیم قربانیاں دی ہیں، شہداء کی قربانیاں رائیگاں نہیں جانے دیں گے، دہشتگردی کے ناسور کا خاتمہ کرکے دم لیں گے۔